Búgin Túrki akademııasy halyqaralyq uıymy Astanada «Túrki áleminde tulǵalar taǵylymy» serııasy boıynsha Alashordanyń 100 jyldyǵyna oraı «Alash áskeri: tarıhtan taǵylym» taqyrybynda ekinshi semınar ótkizdi.
Semınarda qoǵam qaıratkeri Berik Ábdiǵalıuly jınalǵan kópshilikke ashyq leksııa oqydy. Tarıhshy óziniń jańa jaryq kórgen «Alashordanyń áskerı qurylymy (1917-1920 jj.)» atty kitabynyń negizinde Alashorda úkimetiniń ulttyq áskeriniń qalyptasý kezeńin jan-jaqty baıandady. Ol alǵash ret Máskeý, Sankt-Peterbor, Omby jáne Tomsk qalalarynyń arhıvteri men kitaphanalarynda saqtalǵan qujattyq derekterdi keltire otyryp, Alashorda úkimetiniń sol dáýirdegi Ýaqytsha Sibir úkimeti, kazaktardyń áskerı toptary sııaqty mańyzdy tarıhı faktorlarmen ara-qatynasyn aıtty.
Ulttyq akademııalyq kitaphanada ótken alqaly jıynǵa qatysqan kórnekti memleket jáne qoǵam qaıratkerleri, dıplomattar, ult zııalylary men zertteýshi-ǵalymdar da sóz sóılep, paıymdy pikirlerin ortaǵa saldy.
Akademııa basshysy Darhan Qydyráli Berik Ábdiǵalıulyna rahmet aıtyp, «Túrki halyqtarynyń tarıhyn zertteýge qosqan úlesi úshin» TWESCO Alǵys hatymen marapattady.
Aıta keteıik, Halyqaralyq Túrki akademııasy byltyr «Tulǵalar taǵylymy» atty semınarlar legin bastaǵan. Dástúrli semınardyń eń alǵashqysy tatar halqynyń kórnekti qaıratkeri Ábdiráshıt Ibrahımge arnalǵan bolatyn.
Maıgúl Sultan,
«Egemen Qazaqstan»