Balalardy patrıotızmge qalaı tárbıeleýge bolady? Qaztalov orta mektebine barǵanymda murajaıǵa jınaqtalǵan jádigerler ishinen keńestik zamandaǵy áskerı belbeý men Aýǵan soǵysyna qatysýshylar kıgen telpekke kózim tústi. Mekteptiń osyndaı kóne jádigerlerdi jınaqtaýy kóńilge qýanysh uıalatty.
Bylaı qarasańyz qarapaıym belbeý men telpek. Biraq onyń arjaǵynda maǵyna jatyr. Sál sheginis. Sonaý 60-70- jyldary mektepte oqyp júrgenimizde armııadan aǵalarymyz oralatyn. Olardy búkil aýyl aspanǵa kóterip qarsy alatyn. Bala bitken áskerden kelgen aǵanyń qasynan shyqpaıtyn. Bireýi fýrajkasyn kıedi, bireýi belbeýin taǵady. Belbeýdi aýyl balalary «soldatskıı remen» (balalardyń tilimen aıtqanda) dep ataıtyn. Sol «soldatskııdi» belimizge taǵyp alyp, kóshede júretinbiz. Tipti mektepke de taǵyp baratynbyz. Ony taqqan bala úlken bedelge ıe bolatyn. Sol qalyń qaıys beldikpen balalardy «qorqytyp» ta qoıatynbyz... Iá, sol kezdiń balalary áskerge barýdy armandaıtyn. Áskerı kıimdi kıip júrgisi keletin. Bul keńestik kezeńniń patrıotızmge tárbıeleýdiń bir úlgisi sııaqty kórinedi de turady.
Qazirgi kúnde jastardy patrıotızmge, otansúıgishtikke tárbıeleýde burynǵy kezdiń áskerı kıimi de áser etkenin bilgen durys-aý deımiz. Bir ǵana «soldatskıımen» qansha bala áskerge arman qýyp attandy. Bir ǵana «soldatskıımen» qanshama jastar keshegi Aýǵanstannyń ot-jalynyna sharpyldy... Bul adam boıyndaǵy batyrlyqty janıtyn rýh. Elbasymyzdyń «Rýhanı jańǵyrý» baǵdarlamasyndaǵy sózderdiń mánderine úńilsek, ótkenniń búgingige tıgizer jaqsy jaqtaryn alýdy mindettep tur emes pe? Kúni erteń qaztalovtyq oqýshylar da ákeleri taqqan áskerı beldiktiń mánin uǵyp, naǵyz Otan qorǵaýshylarǵa aınalady.
Serik JUMAǴALIEV
Batys Qazaqstan oblysy