Ortalyq kommýnıkasııalar qyzmetinde sarapshylar – Sybaılas jemqorlyqqa qarsy strategııany júzege asyrýdyń syrtqy saraptamasy men baǵalaý jónindegi arnaıy monıtorıng toby músheleriniń qatysýymen baspasóz máslıhaty ótti. Arnaıy monıtorıngteý tobynyń músheleri Sybaılas jemqorlyqqa qarsy strategııany iske asyrýdyń alǵashqy nátıjelerin jáne toptyń 2018 jylǵa arnalǵan jumys josparyn jarııalady.
«Qazaqstan búgingi tańda jemqorlyqqa qarsy strategııanyń birinshi kezeńin, ıaǵnı 2015-2017 jyldarǵa arnalǵan jospardyń bastapqy kezeńin aıaqtady. Endigi 2018-2020 jyldarǵa arnalǵan is-sharalarymyzǵa qadam bastap otyrmyz», dedi Memlekettik qyzmet isteri jáne sybaılas jemqorlyqqa qarsy is-qımyl agenttigi Sybaılas jemqorlyqqa qarsy saıasat departamentiniń dırektory Salaýat Syılybaıuly.
Sarapshy Aıgúl Soloveva Sybaılas jemqorlyqqa qarsy strategııanyń oryndalý barysyn, memlekettik qyzmetti, quqyq qorǵaý organdaryn jáne sot júıesin reformalaýdyń mańyzdy qadamdaryn atap ótti.
«Sońǵy eki jylda biz kásibı memlekettik apparattardy qalyptastyrýda, sondaı-aq memlekettik qyzmet standarttaryn iske asyrýda – quzyretti irikteýde, quqyq qorǵaý organdaryn merıtokratııa qaǵıdaty boıynsha ilgeriletýde úlken ózgeristerdi baıqadyq. Mysalǵa, úsh satyly irikteý júıesin engizý quqyq qorǵaý organdarynda oqýǵa túskenderdiń sanyn qysqartty (2016 jyly 8640-tan 2017 jyly 6181-ge), bul qabyldanatyn kadrlardyń sapasynyń jaqsarǵanyn bildiredi», dedi ol.
«Atameken» UKP ókili Murat Ábenov memleket jalǵyz ózi jemqorlyqpen kúreskenimen jetistikke jete almaıtynyn alǵa tartyp, onymen qoǵam bolyp kúresý kerektigin tilge tıek etti.
«Ol úshin memleket óz tarapynan ashyq jarııa túrde jumys istep, qoǵam sony qoldaýy kerek. Sybaılastyq jasaǵandardy synap, taza, shynaıy jumys istegenderdi qoldaǵan jón. Sonda ǵana jemqorlyq jolyn tolyq jaýyp tastamasaq ta, sanyn azaıta alamyz», dedi ol.
Raýan QAIDAR, «Egemen Qazaqstan»