Sábıt Muqanov útir-núktesi qoıylmaǵan býma-býma qoljazbasyn baspaǵa ákep: «meni soǵan (tynys belgileri – T. M) bola áýrelemeńdershi, aınalaıyndar» deıdi eken. Qalyń papkiden bet sany da qoıylmaǵan bir paraq túsip qalsa, «qaı bet edi?» dep suraǵandarǵa, «oqyǵanda ózi túsinikti bolady» deıtin kórinedi. Bul jazýshynyń redaktorǵa sengeni.
1980-jyldardyń basynda Tursynbek Kákishevtiń «Ońasha otaý» degen kitabyna redaktor boldym. Avtor qysqartýǵa kónbeı, kitaptyń shyǵýy uzaqqa sozyldy. Komıtet Alash arystarynyń atyn alyp tastaý kerek degen tizim berip qoıǵan. Synnyń qalyptasý kezeńi týraly jaqsy eńbek. Biraq Baıtursynov, Sádýaqasov, Aımaýytovtardyń aqtalmaǵan kezi. Senzýra jibermeıdi. Tursynbek aǵamyz kelip: «Men olardy maqtap ta turǵan joqpyn, pikirlerin ǵana aıtyp otyrmyn» deıdi. Men durys deımin. О́zim jibergenmen menen keıin oqıtyndar bar. Sóıtip úsh jyl aıtysyp-tartysyp shyqty. Avtordyń aıtqan oıynyń úshten biri ǵana qaldy. Kitap julmalanyp shyqty. Ol kezde jaqsy eńbekterge osyndaı qııanattar jasalyp jatatyn. Qalmuqan Isabaev pen Kámen Orzalınnyń romandaryna redaktor boldym. Qalaǵań marqum Ertis-Qaraǵandy kanalynyń boıymen jaıaý júrip, roman jazdy. Sony oqyp otyryp, shubalańqy, keı jeri kórkem shyǵarmadan góri pýblısıstıkaǵa keletin jerlerin syzyp, eskertýler aıtsam, «ony ózim de bilip edim, qý bala, baıqap qoıypsyń» dep kelisip otyratyn. Bir kúni «Qalaı bop jatyr?» dep kelipti. «Aǵa, sýy kóp bop tur» desem, «Endi ózi de sý týraly ǵoı, sýy kóp bolmaı ma?» dep kúlip, qatty daý-damaıǵa barmaı ymara tabatyn. Keıin Astanaǵa aýysyp, «Elorda» baspasyna kelgende arnaıy meni izdep kelip, kezekti kitabyna redaktor etip aldy. Kámen Orazalınnyń «Abaıdan soń» deıtin tórt kitaptan turatyn romany shyqty. Birinshi kitaby qysqaryp shyǵypty, keıingi úsheýi meniń qolymnan ótti. Sońǵy tórtinshi kitaby shyǵarda ol kisi de Astanaǵa izdep kelip, redaktor bolǵanymdy qalady. 600 bet qoljazbasyn tórt júz jetpis betke qysqarttym. Renjigen joq.
Qazirgi kitaptyń ońbaı jatqany – redaktordyń joqtyǵy. Qazirgi baspa tolyq emes, redaktory joq. Kez kelgen fılologııany bitirgen adam oqyp beredi. Shynyn aıtqanda oqyǵan bolady. Eshqandaı redaksııalaý joq. Sherıazdan Eleýkenov baıaǵyda aıtatyn: «Qoljazba – shıkizat» dep. Sol shıkizatty kitap etip shyǵaratyn – redaktor.
Turlybek MÁMESEIIT, jazýshy