Úsh olımpıadada jelbiregen

Tý – qashan da qasıetti, kıeli, memlekettik rámiz. Son­dyqtan jaqsysy, jama­ny bolmaıdy. 2000 jyly jasyl qur­lyq Avstralııanyń Sıdneı qalasynda Olımpıada oıyn­darynyń alaýy tutanǵanda redaksııadan bir kók baı­raqty “Egemenniń” tórt saıypqyrany kóterip bar­ǵan. Olar: Rysbek Sársen­baı, Erkin Qydyr, Ońdasyn Elýbaı jáne Ǵalym Sú­leımen. Olımpıadanyń ortasyna deıin kóńildi kúpti qylyp, besin aýyp namazdiger bol­ǵanda Qazaqstan qorjynyna altyndar men kúmister jaýdy. Qazaqtyń Bolat Jumadilov, Bekzat Sattarhanov, Ermahan Yby­raıymov jáne Muqtarhan Dildá­bekov sekildi oǵlandary qarsy­lastarynyń qabyrǵalaryn sógip, fınalda aıqas saldy. Bekzat pen Ermahan Olımpıada jeńimpazy atandy. Jelden júırik qyz Olga Shıshıgına altynnan alqa taqty. Sonda osy baıraq olardyń ıyǵyna jabylyp, jeńis teri sińgen edi. 2003 jylǵy Afına Olımpıa­dasynda bahadúr Baqtııar Artaev osy baıraqpen atoı saldy. Al 2007 jylǵy Beıjiń olımpıa­dasyna kóterip barý bizdiń enshimizge tıgen edi. Dzıýdoshy Ashat Jıtkeev mońǵol Naıdanmen aıqas salyp, tuǵyrǵa kóterilerde qazaq baıraǵyn surady. Lyp etkizip ıyǵyna japtym. Kúmis bolsa da qazaq dzıýdo tarıhyndaǵy eń joǵary medal edi bul. Bú­ginde álem chempıonatyn úsh márte baǵyndyrǵan Ilıa Ilın jigittiń jaısańy. Julqa kóte­rýde qorqytyp alady da, serpe kóterýde sheksiz qýanyshqa bóleı­di. Oń qoly shyntaq tusynan tamyry tartylyp qalsa da tula boıy namysqa sýarylǵan jampoz altyndy qarsylastarynyń qo­ly­nan julyp aldy. Kózimen tý izdegende jattyqtyrýshylardyń arasynan jyqpyl taýyp, jeldeı ushyp jetkizip berdik. Jerlesimiz Olımpıadanyń altynyn alyp, Qazaqstannyń dańqyn álemge jaıyp jatqanda kim bizdiń joly­myzǵa tosqaýyl bolady. Ilıa tershigen betin baıraq shetimen súrtti. Kýbalyq qara qabylandy oqsatyp, bula boıy býsanyp kele jatqan Baqyt Sársekbaev ta osy baıraqty jamylyp, sýretke tústi. Júldegerge de yrym etip japtyq. Bul baıraq “Egemenniń” aty­nan Dohada (Katar) jáne Gýanchjoýda (Qytaı) ótken Azııa oıyn­daryna barǵan bizdiń qoly­myzben talaı asyldarymyzdyń ıyǵyna jabyldy. Azııa oıyn­dary degenińizben tórt jylda bir ret ótetin bul sport jarysy – Azııa halyqta­rynyń olımpıadasy. Azııa atty alyp qurlyqtyń 45 memleketi baq, namys synaı­tyn kezeńde Qazaqstan Qytaı, Japon jáne Ońtústik Koreıa sııaqty álemge áıgili memleketterdi ǵana aldyna salyp, tórttikti túıindep keldi. 1,5 mıllıardqa jete­ǵabyl halqy bar Úndis­tannyń ózi Qazaqstan asýy­nan óte almaı myqshyńdap júrgenin kóz aldyńyzǵa eles­tetseńiz, Otanyńyzǵa degen qurmet eselene túsedi. Batyr, baǵlandary­myz­dyń Otan mereıin asqaq­tatqan shaǵynda tóbesinde teńizdeı tolqyǵan “Egemen­niń” bul baıraǵynyń endigi kóteriler kezi 2012 jyly London Olımpıadasy dep oılaımyz. Baqtııar TAIJAN. Shymkent. ___________________ Aıqarma bettiń materıaldaryn uıymdastyrǵan Qorǵanbek AMANJOL,  «Egemen Qazaqstan».