«Jolaýshylar tasymaly» AQ jyljymaly quramdy jańartý baǵdarlamasyn iske asyrýdy jalǵastyrýda. Jolaýshylar vagon parki 12 kýpelik vagondarmen tolyqtyryldy, onyń ishinde 2 vagon shtabtyq – olar múmkinshiligi shekteýli jandar men olardy alyp júrýshilerge arnalǵan.
Jańa vagondar sapardyń jaılylyǵyn qamtamasyz etedi. Temir jol kóligi qaýipsizdik jáne sapa jaǵynan barlyq halyqaralyq standarttarǵa saı. Jyljymaly quramdy óndirý kezinde zamanaýı, ekologııalyq taza jáne janýy qıyn materıaldar paıdalanylǵan.
Ulttyq tasymaldaýshy múmkindigi shekteýli jandarǵa jaıly jaǵdaı jasaýǵa kóńil bólýde. Osyǵan oraı, kompanııa múgedekter men olardy alyp júrýshilerge arnalǵan 2 shtabtyq kýpe vagondaryna tapsyrys berdi. Olar arbada otyrǵan múgedekti poıyzǵa otyrǵyzyp, túsiretin avtomatty kótergish quraldarmen qamtamasyz etilgen. Sonymen qatar, vagonnyń tambýry, dálizi, kýpesi jáne sanıtarlyq toraby keńeıtilip, múmkindigi shekteýli jannyń ózdigimen qozǵalýyna kedergi jasamaıdy.
Quramdar ekologııalyq taza dárethanalarmen, aýdıo jáne beınetasymaldaý júıelerimen, jeldetkishtermen, jylý jáne órt sóndirý dabyldatqyshtarymen qamtamasyzdandyrylǵan. Vagondarda qysqatolqyndy pesh, tońazytqysh, sonymen qatar aqparattyq tablo, ár kýpede teledıdar ornatylǵan. Kýpelik vagon 40 orynǵa, kýpelik shtabtyq – 34 orynǵa eseptelgen.
«Jolaýshylar tasymaly» AQ 2012 jyly 180 zamanaýı vagondy satyp alýdy josparlap otyr, bul óz kezeginde halyqtyń temir jol kóligimen jolaýshylar tasymalyna degen suranysyn qanaǵattandyrady.
«Egemen-aqparat».