Bul kúni Jambyl aýylyna meımandardyń shaqyrýsyz jınalatyny bar. Almatydan arnaıy kelgen aqyndar sahnaǵa shyǵyp ta, syrttaǵy aqyn eskertkishiniń aldynda turyp ta óleń oqydy. Jyr tunǵan aýyldyń jalyndy urpaǵy jyr múshaırasyn ilip alyp ketti. Toı qyzdy.
Alataýda qalyń qardyń kóbesi sógilmegenmen, etektegi aýylda kún kúlimdep kóktem shyqty. Belgili aqyn-pýblısıst Orysbaı Ábdildauly «Jákemniń qudireti shyǵar, men es bilgeli onyń týǵan kúni óz aýylynda bir kún ataýsyz ótken emes, – deıdi. – Memleketettiń ótkizetin mereıtoılary óz aldyna jáı ýaqytta da, sonaý dúrildegen kommýnıstik Keńes zamanynyń ózinde de aqyn atamyzdyń dúnıege kelgen kúni zıratynyń basynda Quran oqyp, eskertkishiniń aldynda jyr oqıtyn edik. Sol úshin belgili sportshy Izbasar Orazbaqov bastaǵan bir top stýdent Alataýdy jaǵalap Almatydan aýylǵa shańǵymen jetetinbiz. Ol kúnder qaıda, shirkin...»
Jazýshy Jumabaı Shashtaıuly jınalǵan qaýym aldynda Jambyl fenomeniniń myńjyldyqtar tarıhymen ólshenetinin ekshep aıtsa, akademık-jazýshy Ýalıhan Qalıjanov pen jambyltanýshy ǵalym-jazýshy Naǵashybek Qapalbekuly HH-shy ǵasyr Gomeriniń sanaly ómiri men qoǵam aldyndaǵy ólsheýsiz qaıratkerlik qyzmeti týraly taǵylymdy baıandama jasady. Aqyn Ulyqbek Esdáýlet tebirene jyr oqydy:
Shartarapqa tanytqan súıikti elin,
Qaıran qyran, juldyzǵa jýyq pa ediń?
Alataýym turǵanda jerim bıik,
Jambyl barda – qazaǵym bıik meniń!
Adamzattyń aspanyn bıiktetken Uly Jambyldyń HHI-shi ǵasyrdyń tabaldyryǵynan attaǵan ólsheýsiz qazynasy Elbasynyń búgingi «Rýhanı jańǵyrý: bolashaqqa baǵdar» baǵdarlamasynyń basty baǵytynyń biri ekeni, memlekettik ult bolmysyn túletý ıdeıasyna da tolyq saı keletini haqynda tolǵamdy oı-pikirler aıtyldy.
Alqyzyl bop alaýlaǵan merekelik sahnaǵa gúl-jaınaǵan óner sheberleri án men jyrdan shashý shashty, kúmbirletip kúı tartty. Kórermen rıza kóńilmen qol soqty. Uly babamyzdyń arýaǵana arnalyp Quran baǵyshtaldy, mal soıylyp, as berildi.
Talǵat SÚIINBAI,
«Egemen Qazaqstan»
Almaty oblysy,
Jambyl aýdany
Sýretterdi túsirgen Nurmanbet QIZATULY