Qazaqstannyń túkpir-túkpirinen jınalǵan 300 talapker aldaǵy tórt jylǵa jaramdy 100% granttar men jeńildikterge ıe boldy. Sýleıman Demırel ýnıversıteti SPT-2018 respýblıkalyq zııatkerlik olımpıadasyn qorytyndylady.
Olımpıada sharty boıynsha qatysýshylar jalpy bilim deńgeıin anyqtaý maqsatynda alty klasterlik baǵyttar: Fızıka, Geografııa, Hımııa-Bıologııa, Aǵylshyn tili, Ádebıet, Tarıh pánderi boıynsha baq synady. Ár klasterde qatysýshylar úsh pán boıynsha test tapsyrdy. Barlyq granttar men jeńildikter qatal túrde tek tańdaǵan baǵyt boıynsha teńdeı bólindi.
Sonymen, alǵashqy oryndar men 4 jylǵa arnalǵan 100% granttar 6 baǵyt boıynsha elimizdiń túkpir-túkpirinen qatysqan jeńimpazdarǵa buıyrdy. Aıta ketken jón grant ıegerleri ulttyq biryńǵaı testileýden bosatylmaıdy, alaıda joǵary oqý ornyna qabyldaný úshin olarǵa tek 50 upaı jaramdy.
«Jobanyń basty maqsaty – Elbasynyń adamı kapıtaldy jańǵyrtýǵa baǵyttalǵan halyqqa joldaýyn júzege asyrýǵa negizdelgen. Sonymen qatar talapkerlerge emtıhan aldynda bolashaq mamandyǵyn tańdap,bilim deńgeıi men qabiletin tekserýge qoldaý kórsetý. Jazǵy mezgilde emtıhanan soń talapkerlerdiń basym kópshiligin mamandyqty durys tańdaý máselesi alańdatady. Jobaǵa qatysý arqyly túlekter aldyn ala tańdaý jasap, ózine qajetti 6 klasterlik baǵyt boıynsha múmkindigin synap, durys sheshim qabyldaýǵa daıyn bolady. Olımpıadanyń taǵy bir ereksheligi – balalarǵa ulttyq biryńǵaı testileý aldynda psıhologııalyq kómek berýinde»,- deıdi jobanyń uıymdastyrýshylary.
Eske sala keteıik, respýblıkalyq SPT olımpıadasy 2018 jyldyń 4-naýryzynda testileý formatynda elimizdiń 19 iri qalasy men shalǵaı aýdandarynda bir mezgilde ótti. Is-sharaǵa respýblıka boıynsha 12 myńnan asa talapker qatysty.