Pavlodar qalasynda ótken Máshhúr Júsiptiń 160 jyldyǵyna arnalǵan «Kúı tartys» baıqaýy oblystyq bilim berý basqarmasynyń bastamasymen osymen 7-shi ret uıymdastyrylyp otyr. Baıqaý bolǵan kúni Oqýshylar saraıynda «Rýhanı jańǵyrý» kabıneti ashyldy.
Baıqaýǵa 10-15 jas aralyǵyndaǵy 30-ǵa jýyq oqýshy qatysty. Aldymen, qazylar alqasy kúıshilerdi jeke-jeke tyńdap aldy. Úmitkerlerge baǵa berý barysynda olardyń oryndaý sheberligi, ártistigi, eki qoldyń qoıylymy, sahnalyq kıimi basty nazarǵa alyndy. Kelesi kezekte kúıshiler jekpe-jek kezdesip, kúı tartys ta bas-aldy. О́nerpaz órender Qurmanǵazynyń «Balbyraýyn», «Adaı», Dáýletkereıdiń «Túrkimen», Á.Jeldibaevtyń «Erke-sylqym», Dınanyń «Toı bastar» kúılerin jáne basqa halyqqa keńinen tanymal shyǵarmalardy oryndap berdi.
Jahandaný zamany ústemdik qura bastaǵanyna qaramastan kishkentaılarynan qoldaryna dombyra ustap, ulttyq ónerdi ulyqtap júrgen ul-qyzdarǵa ishteı rıza bolyp, qyzyǵa qaradyq.
Asa tartysty báıgeniń bas júldesi oblys ortalyǵyndaǵy Qurmanǵazy atyndaǵy №1 balalar mýzyka mektebiniń oqýshysy Aıshat Baqytovaǵa berildi.
– Bul jeńisimdi ustazym Qýanysh Meıramulyna arnaımyn. Bul synda Tólegen Mombekovtiń «Saltanat» kúıin oryndadym, – deıdi Aıshat qýanyshyn jasyra almaı.
Al 1-shi oryndy Ekibastuzdaǵy balalar mýzyka mektebiniń oqýshysy Arman Serikov, 2-shi oryndy Pavlodardaǵy №2 mekteptiń oqýshysy Aıdos Áýbákirov pen №35 mekteptiń oqýshysy Darıǵa Sahıeva ıelense, 3-shi oryndy Ertis aýdany balalar óner mektebiniń oqýshysy Aıman Ilııasheva men Oqýshylar saraıynyń «Jas ekpin» dombyra ansambliniń múshesi Ásemgúl Toqbaeva aldy.
Farıda Byqaı, «Egemen Qazaqstan» Pavlodar