Búginde qazaqstandyq gúrzi judyryq ıelerinen álemniń kez kelgen boksshylary qaımyǵyp, bizdiń batyrlarmen sanasatyny belgili. Bul álemdik boksta qazaqstandyq sportshylardyń ózindik oıyn órnegi bar ekendigin kórsetke kerek. Dúnıeniń ár qıyrynan 300-ge tarta sportshy qatysqan Vengrııadaǵy jastar arasyndaǵy aıtýly halyqaralyq týrnırde aqmolalyq sportshy jasyndaı jarqyrady.
Vengrııanyń Eder qalasynda jastar arasynda ótken halyqaralyq týrnırde Aqmola oblysynyń boksshysy Talǵat Shaıken eshkimge des bergen joq. Qazaqstan jastar qurama komandasy sapynda synǵa túsken ol 64 kılo salmaqta chempıon atandy. Birinshi jekpe-jekte Talǵat germanııalyq boksshyny jeńip, alǵa ozdy. Kelesi aıqasta ol jergilikti vengr boksshysyn tize búktirip, óziniń myqty ekendigin taǵy dáleldedi. Budan keıingi judyryqtasý Danııa sportshysymen jalǵasty. Fınaldyq saıysta aqmolalyq sportshy álsizdik tanytpaı, qarsylasyn tyqsyra júrip qapy qaldyrdy. Osylaısha úsh kezdesý nátıjesi boıynsha jerlesimiz altyn júlde aldy.
Reti kelgende aıta keteıik, Talǵat Qajymuqan atyndaǵy №3 arnaıy oblystyq balalar-jasóspirimder sport mektebiniń tárbıelenýshisi. Sondaı-aq ol jattyqtyrýshy Qýat Beısenbaevtyń jeke jetekshiligimen sheberligin shyńdap keledi. Alda Talǵat Shaıkendi áli oqý-jattyǵý jıyndary men josparlanyp otyrǵan Bangkok qalasynda (Taıland) ótetin Azııa chempıonaty kútip tur.
Asqar TURAPBAIULY,
«Egemen Qazaqstan»
Aqmola oblysy