Elbasynyń qatysýymen ótip jatqan elordany odan ári damytý máseleleri jónindegi májiliste qala ákimi Áset Isekeshev Astanada jańadan 10 emhana ashylatynyn aıtty.
«Ákimdik ómir sapasy men uzaqtyǵyna áser etetin negizgi aýrýlarǵa nazar aýdaryp otyr. Sońǵy 10 jyldyń qorytyndysy boıynsha densaýlyq saqtaýdyń negizgi kórsetkishteri boıynsha ońtaıly qarqyn bar. Insýlttik ortalyqtardyń ashylýy, dıagnostıka men emdeýde jańa tehnologııalardy qoldaný ótken jyly ınsýltten ólim-jitimdi 33,7 paıyzǵa, al mıokard ınfarkty 36,4 paıyzǵa tómendetýge múmkindik berdi», degen Astana ákimi medısınalyq kómek kórsetýge aıryqsha mán berilip otyrǵanyn jetkizdi.
Onyń aıtýynsha tek 2017 jyly 8700 medısınalyq maman biliktilikti arttyrý kýrstarynan ótken. 40 dáriger Ońtústik Koreıa, Izraıl jáne Germanııanyń úzdik klınıkalarynda bilimin jetildirgen. Aǵymdaǵy jyly da bul jumystar jalǵaspaq.
«Bıylǵy qyrkúıekten bastap dárigerdiń jumys ornyn tolyqtaı avtomattandyrý qamtamasyz etilip, qaǵazbastylyq kezeń-kezeńmen joıylady», dedi ol. Iаǵnı medısınalyq uıymdardyń shamadan tys júktemesi men olardaǵy kezektilik máselesi memlekettik-jekeshelik áriptestik tetigi kómegimen sheshilýde.
«Jańa emhanalardyń qurylysynyń ornyna senimgerlik basqarýǵa berýmen qolaıly ǵımarattardy satyp alý josparlanyp otyr. 2025 jylǵa deıin 10 emhanany ashý kózdelgen. Memlekettik-jekeshelik áriptestik tetikteri arqyly 20 mlrd teńgeni únemdeý múmkindigi bar», dedi ákim.