Naýryz aıynyń sońǵy kúnderiniń birinde Q.Jubanov atyndaǵy Aqtóbe óńirlik memlekettik ýnıversıtetiniń janyndaǵy «Mansap» ataýyn ıelengen Aqtóbe stýdenttik memlekettik qyzmet mektebiniń is-tájirıbesimen tanysqan edik.
Biz barǵan kúni 2016 jyly qanatqaqty joba retinde qurylǵan mekteptiń úshinshi maýsymy ashylǵan-dy. Osyǵan oraı arnaıy dárishanada osy bastamanyń basty uıymdastyrýshysy Memlekettik qyzmet isteri jáne sybaılas jemqorlyqqa qarsy is-qımyl agenttigi Aqtóbe oblysy boıynsha departamentiniń basshysy, Ádep jónindegi keńes tóraǵasy Qaıyrjan Tokýshev alǵashqy dáristi oqydy.
Odan keıin joba jetekshisimen ózara áńgimelesý barysynda mektepti qurýdaǵy basty maqsat – stýdentter men jastardy memlekettik qyzmetke aldyn ala beıimdeý, onyń alǵashqy álippesin úıretý ekenine qanyqtyq. Sonymen birge munda sybaılas jemqorlyqqa qarsy is-qımyl tanyta bilýdiń birqatar ıirimderi de jas tyńdaýshylarǵa tanystyrylady. Memlekettik qyzmetke ornalasýdyń alǵashqy qadamy testik júıeden ótýden, ári ózge de tıisti zańnamalyq qujattardy ıgerýden bastalatyny belgili. «Mansap» mektebine qabyldaný úshin konkýrstan ótedi. Birinshi, memlekettik qyzmetshige arnalǵan testileýden ótedi, ekinshi esse jazady.
Sonymen birge olar «Mansap» mektebindegi bilim berý úrdisi kezinde óńirge jáne elimizge tanymal beldi tulǵalardyń dáristerin tyńdaıdy. Ári biliktiligi joǵary lektorlarmen ashyq formatta emin-erkin oı-pikir almasa alady. Is basyndaǵy azamattar men maman-sarapshylardyń ómirlik tájirıbesi erteńgi mamandyq ıelerin memlekettik qyzmettiń qyr-syryn aldyn ala uǵynýǵa umtyldyrary anyq. Ekinshi bir erekshelik – mektep tyńdaýshylarynyń memlekettik organdarda óńdiristik tájirıbeden ótýi. Eń bastysy «Mansaptaǵy» dárister stýdentterdiń negizgi oqý baǵdarlamasyna eshqandaı kedergisin keltirmeıdi. Onyń ústine mundaǵy oqý úrdisi tegin júzege asyrylady.
– Memlekettik qyzmettiń basty qaǵıdaty merıtokratııa uǵymynan tamyr tartady. Bul jas talaptyń bireýdiń qoldaýynsyz, qońyraýynsyz, tek óz kúshimen, óz aqyl-qaıratymen jáne óz bilik-bilimimen satylap ósýi degen sóz. Mektepti qurýdaǵy maqsatymyzdyń biri – osyndaı shyndyq pen ádiletke stýdentterdiń kózderin jetkizý edi. Táýbe, bul oıymyz kóńilden shyǵyp keledi deıdi jobanyń úılestirýshisi Qaıyrjan Tokýshev.
Budan eki jyl buryn «Mansap» qanatqaqty joba retinde ashylǵan kezde oǵan oqýǵa 25 stýdent yqylas tanytqan. Keıin onyń 19-na mektepti támamdaǵany jónindegi sertıfıkattar tapsyrylǵan. Al kelesi 2017 jyly oǵan qatysýǵa nıet bildirgenderdiń sany 252-ge jetip, bes esege bir-aq kóterilgen. Sóz joq bul óte súıinishti jaıt. Memlekettik qyzmetke degen umtylys pen qyzyǵýshylyqtyń kórinisterin ańǵarta alatyn qundy kórsetkish.
Atalǵan jyly zańnamany bilýge arnalǵan testileýden 102 stýdent súrinbeı ótkeni de táýir nátıje. Budan keıingi ýákiletti organ ókilderimen áńgimelesý barysy boıynsha test tapsyrǵandardyń besten-biri mektep tabaldyryǵyn attapty. Búgingi kúni olardyń deni memlekettik qyzmettiń ár salasynda qyzmet atqaryp júr. Solardyń biri, Aqtóbe oblystyq bilim basqarmasynyń bas mamany Rızat Qarasaev «Mansap» mektebi óz ómiriniń jańa paraǵyn ashqanyn aıtyp berdi. Onyń tabaldyryǵyn attaǵannan keıin kóńildegi kúmándi oılarymnyń bári seıildi. Meniń tańdaýym – memlekettik qyzmet bolyp shyqty. Bul úshin bastama ıelerine alǵysym men rızashylyǵym sheksiz, deıdi ol.
Al mekteptiń ekinshi bir túlegi Medet Kamılov memlekettik qyzmetke jastardy aldyn-ala ázirleý men tartý tyń ári jańashyl joba ekenine toqtaldy. Buǵan qosa «Mansapta» teorııa men tájirıbeniń tyǵyz úılesim tabýy óte paıdaly bolǵanyn jetkizdi. Shyny kerek, buryn-sońdy bilmegen aqparatqa qanyq boldym. Memlekettik qyzmet salasyn baqylaý basqarmasynda taǵylymdamadan óttim. Departament qyzmetkerlerimen birige otyryp jumys istedim. Tártipti úırendim. Ádep pen qyzmettik qarym-qatynastardyń qundylyqtaryn boıyma sińirdim, dep aǵynan jaryldy ol. Qysqasy «Mansap» Aqtóbe stýdenttik memlekettik qyzmet mektebi erekshe, aıryqsha ári biregeı joba ekeni anyq. Sirá úırenýge turarlyqtaı úrdistiń bir mysaly osyndaı-aq bolar.
Temir QUSAIYN, «Egemen Qazaqstan»
AQTО́BE