Búginde Elbasy Nursultan Nazarbaevtyń «Prezıdenttiń bes áleýmettik bastamasy» atty Úndeýi halyq tarapynan ekpindi qoldaý taýyp jatqany belgili.
Men Elbasynyń bul ıgi bastamasyn jastardyń joǵary bilim alýdaǵy ashyqtyǵy men joǵary sapasyna qaraı, sondaı-aq tehnıkalyq bilimniń qaryshtap damýy turǵysynan qoldaımyn. Ondaǵy jyl saıynǵy bólinetin 54 myń grantqa qosymsha 20 myń grantty jáne onyń 11 myńyn tehnıkalyq mamandyqtarǵa qaraı bólýi tehnıkalyq bilim beretin joǵary oqý oryndaryn memleket tarapynan shyn mánindegi qomaqty qoldaý dep túsingen jón. Qazirgi tańdaǵy tórtinshi ónerkásiptik jańǵyrý jaǵdaıynda tehnıkalyq mamandardy daıarlaý, onyń ishinde aqparattyq tehnologııa aıdynynda robottandyrý salasynyń, sondaı-aq nanotehnologııalar dáýiriniń saltanat qurýy memleketimizdiń strategııalyq mindetteri bolyp tabylady. Bul memleketimizdiń jańa álemdegi básekege qabiletti bolýyna, bolashaqtaǵy qazaqstandyq ekonomıkanyń qýatty resýrstaryna aınalatyn myńdaǵan mamandardy daıarlaýǵa úlken múmkindik ashpaq. Sonymen birge Elbasynyń bul bastamasynyń arqasynda belgili bir deńgeıde stýdentterimizdiń shetelge oqýǵa barmaı-aq otandyq bilimniń ózimen birshama bıikterdi baǵyndyrýyna jaǵdaı týǵyzbaq. Osy arqyly elimizdegi joǵary oqý oryndarynyń jumysyna jańa serpin berilip, bilim sapasynyń jaqsarýyna, oqytýshylardyń biliktiligin arttyrý men materıaldyq-tehnıkalyq bazanyń kúsheıýi sııaqty tetikter jańa kezeńge ótedi. Sáıkesinshe, grant ıegeri, bolashaq stýdent te otandyq oqý oryndaryn oılanbaı tańdaıtyn bolady. Oǵan sondaı-aq joǵary oqý oryndaryna deıingi orta bilim beretin bilim oshaqtary da óz úlesterin qosýy kerek.
Álı ÁBIShEV, Atyraý munaı jáne gaz ýnıversıtetiniń rektory
ATYRAÝ