Jyl saıyn 1 sáýir men 31 mamyr aralyǵynda «Bekire» keń aýqymdy balyq qorǵaý naýqany ótedi. Baǵaly sý marjandaryn qorǵaýǵa baǵyttalǵan sharanyń alǵashqy on kúninde quqyq buzýshylardan 768 kg balyq tárkilenip, onyń 32 kg bekire tuqymdas túrlerine 336 myń 800 teńge ákimshilik aıyppul salyndy.
Atyraý oblystyq orman sharýashylyǵy jáne janýarlar dúnıesi ınspeksııasynyń ókili Oleg Týshkanovtyń aıtýynsha, qorshaǵan ortany qorǵaý zańnamasyn buzýdyń 47 deregi tirkelgen. 28 adam ákimshilik jaýapkershilikke tartylyp, 19 balyq aýlaý jáne 5 birlik júzý jáne kólik quraldary tárkilendi.
Atalǵan ınspeksııa naýqan ýaqytynda 17 beket uıymdastyrýda. 9 beket Jaıyq ózeninde, beseýi Qurmanǵazy aýdanynda, úsheýi jyljymaly túrde qyzmet etedi. Aksııa Atyraýmen qatar Mańǵystaý, Batys Qazaqstan oblystarynyń da aýmaǵyn qamtıdy.
Alǵashqy onkúndikte memlekettik tapsyrys boıynsha Atyraýdaǵy eki bekire zaýytyna salmaǵy 100 kg, uzyndyǵy 2 metr bekire, salmaǵy 38 kg bekire jáne eki shoqyr balyǵy aýlandy. Bıyl bekire zaýyttary qaıta jańǵyrtylady degen jospar bar. «Jaıyq Kaspıı» jáne Atyraý balyq ósirý zaýyttarynyń barlyq jabdyqtary jańartylady. «Sonyń nátıjesinde eki nysannyń jalpy qýaty jylyna 30 mln bekire shabaǵyn ósirýge jetetin bolady» dep habarlady Aýyl sharýashylyǵy mınıstrligi Orman jáne janýarlar álemi komıtetiniń atqarýshy tóraǵasy Marlen Aınabekov. Ázirge zaýyttardyń qýaty jylyna 7 mln shabaq qana bolyp otyr.
Baqytgúl BABASh, «Egemen Qazaqstan».
ATYRAÝ