Dúnıejúzilik densaýlyq kúnine oraı Batys Qazaqstan oblysynyń Syrym aýdanynda aýyr atletıkadan 20 jasqa deıingi uldar men qyzdar arasynda oblys chempıonaty ótti.
Saıysqa Batys Qazaqstan oblystyq balalar men jasóspirimderdiń sport mektebi men sportqa daryndy balalarǵa arnalǵan mektep-ınternattyń janyndaǵy aýyr atletıka úıirmeleriniń shákirtteri, Qaztalov, Syrym aýdandary, Oral qalasy jáne Jalpaqtal aýyly jeke komanda quryp qatysty. Sóıtip, Jympıtyǵa barlyǵy 60 ziltemirshi jınaldy.
- Syrym aýdanynda aýyr atletıka úıirmesi ótken jyldyń qyrkúıek aıynda ǵana ashyldy. Ol jerde Qazaqstan Respýblıkanyń birneshe dúrkin chempıony, Qazaqstan Respýblıkasynyń sport sheberi Raýan Búrkitov bapkerlik etip júr. Osy úıirmeni ashýǵa Batys Qazaqstan oblystyq sport basqarmıasy men Syrym aýdany ákiminiń orynbasary Asylanbek Sarqulov kóp qoldaý kórsetip edi. Mine, eńbegimiz aqtaldy, nátıje jaqsy. Syrymdyq jastar arasynan eki chempıon, eki júldeger shyǵyp otyr, - deıdi aýyr atletıkadan Batys Qazaqstan oblysynyń aǵa jattyqtyrýshysy Dáýren Baıtorıev.
Sonymen, Jympıtyda ótken jarys jeńimpazdary bolyp uldar arasynda 30 kelide – Arnur Nurlanov, 34 kelide – Nurǵazy Maqanov, 38 kelide - Murat Bájekenov (Jalpaqtal aýyly), 42 kelide – Rýlan Sarıev, 46 kelide – Serjan Hamıdolla, 50 kelide – Ádiljan Nurtaev (Kaztalov aýdany), 56 kelide – Oraz Jumaǵalı (Syrym aýdany), 62 kelide – О́tepbergen Álıev, 69 kelide – Arman Izteleýov, 77 kelide – Beket Jarbosyn, 85 kelide – Erjan Jumaǵulov, + 85 kelide – Vıktor Tarasov jeńimpaz bolyp tanyldy. Al qyzdar arasynda ótken saıysta Jasmına Muratova (Syrym aýdany, 32 keli), Altyngúl Beketova, (Qaztalov aýdany, 36 keli), Gúlsezim Alǵazıeva (Oral qalasy, 48 keli), Aıymgúl Elemesova (Kaztalov aýdany, 53 keli) chempıon boldy.
- 56 keli salmaq dárejesinen joǵary jeńimpazdardyń barlyǵy Qazaqstan Respýblıkasynyń chempıonatyna joldama aldy, - deıdi Dáýren Beketuly.
Aýyr atletıka – Batys Qazaqstan oblysynda sońǵy jyldary jedel damyp kele jatqan sporttyń túri. Aýyr atletıka boıynsha BQO oblysynyń aǵa jattyqtyrýshysy Dáýren Baıtóreev aýyr atletıka boıynsha oblys chempıonatyn tuńǵysh ótkizgen Syrym aýdany saıysty joǵary deńgeıde uıymdastyrǵan. «Ziltemir sportynyń damýyna qoldaý bildirip otyrǵan jergilikti ákimdik basshylaryna zor alǵys aıtamyz» deıdi Dáýren Beketuly.
Qazbek QUTTYMURATULY, «Egemen Qazaqstan»
Batys Qazaqstan