Jyl saıyn 12 sáýirde Qazaqstan ǵylymı qaýymdastyǵy Ǵylym qyzmetkerleri kúnin atap ótedi. Osy ataýly kúnge oraı «Ǵylym ordasy» ǵımaratynda saltanatty jıyn uıymdastyryldy.
Ulttyq ǵylym akademııasynyń prezıdenti, akademık Murat Jurynov ǵylymı qoǵamdastyqty qurap otyrǵan akademıkter men belgili ǵalymdardy, joǵary oqý oryndary men ǵylymı uıymdardyń, ulttyq jáne ujymdyq qoldanystaǵy ınjenerlik zerthana basshylaryn quttyqtady.
M.Jurynov otandyq ǵylymdaǵy eleýli jetistikterdi atap ótip, órkendep kele jatqan el ekonomıkasyndaǵy barlyq salalardyń tabysy týraly baıandap ótti. Zamanaýı álemde barlyq memleketter ǵylymǵa ekonomıkalyq ósý men básekelestikti qamtamasyz etýshi resýrs retinde erekshe kóńil bóledi. Qazaqstan da óziniń myqty ǵylymı júıesin qalyptastyrǵan el ekenin áldeqashan dáleldegen.
Qazaqstan ǵylymynda ártúrli baǵyttaǵy ǵylymı mektepter damyp, tıimdi nátıje berýde. Búginde Qazaqstanda aýyl sharýashylyǵy, medısına, jer, energetıka salalaryna jetekshilik etetin ǵylymı-zertteý ınstıtýttary saqtalyp qana qoımaı, bul mekemelerde 382 ǵylymı baǵyt boıynsha ǵylymı-zertteý jumystary júrgizilýde. Búkilálemdik básekege qabilettilik reıtinginde Qazaqstan Reseı men Ázerbaıjan elinen keıingi 53-oryndy ıelenedi. Ilgeridegi jyldarmen salystyrǵanda, ǵylymı qyzmetkerlerdiń áleýmettik turmys-ahýaly túzelip, Memleket basshysynyń tapsyrmasy boıynsha bıyl taǵy da 120 ǵalymǵa páter kilti tabys etildi. Mysaly, ǵylymdy qarjylandyrý ishki jalpy ónimniń 1,17 %-yn qurasa, sáıkesinshe bul kórsetkish Ázerbaıjanda 1,5 %, Belarýs elinde 1,2 %, Reseıde 1,0%-dy kórsetip otyr. Ǵylymdy damytýdyń strategııalyq josparyna sáıkes bul kórsetkish 2020 jylǵa qaraı 2 paıyzǵa deıin ósýi tıis.
Álemdik ekonomıkalyq daǵdarystyń qaýip-qaterine qaramastan damyp kele jatqan Qazaqstan ǵylymynyń aǵymdaǵy jaı-kúıine baǵa berip, otandyq ekonomıkany jańǵyrtýǵa úles qosýǵa shaqyrǵan Bilim jáne ǵylym mınıstri Erlan Saǵadıevtiń quttyqtaý hatyn oqyǵan vıse-mınıstr Talǵat Eshenqulov el ekonomıkasynyń damýy jańa tehnologııalarmen birge órbıtinin jetkizdi. El ǵalymdary aldynda turǵan mindetterge toqtalǵan ol, 2018 jyldan bastap elimizde 1096 ǵylymı joba memlekettik grant esebinen qarjylandyrylatynyn aıtty.
Jıyn sońynda ǵalymdar memlekettiń ǵylymǵa jasap otyrǵan qamqorlyǵyna, onyń áleýetin arttyrý jolyndaǵy is-qımylyna, jaldamaly páterde kele jatqan ǵalymdardy baspanamen qýantqanyna alǵys bildirdi.
Aıgúl AHANBAIQYZY, «Egemen Qazaqstan»
ALMATY