Semeıde Elbasynyń «Rýhanı jańǵyrý» baǵdarlamasy aıasynda Almaty qalasyndaǵy «Zeınolla Sánik atyndaǵy mádenıet qorynyń» bastamasymen birlesip belgili qalamger, etnograf, baspager, Qazaqstan Jazýshylar odaǵynyń jáne Qytaı memlekettik jazýshylar qoǵamynyń múshesi Zeınolla Múbárakuly Sániktiń 15 tomdyǵy men onyń jary aqyn, ustaz Shámshabaný Hamzaqyzynyń 2 tomdyq kitabynyń tanystyrylymy ótti. Shara qonaqtaryn kitaphana qoryndaǵy basylymdardan arnaıy daıyndalǵan «Zeınolla Sánik jáne ulttyq rýh» taqyrybyndaǵy kitap kórmesi qarsy aldy.
-Tusaýkeserge Almatydan jazýshynyń jary Shámshabaný Hamzaqyzy, uly Qanat, qyzy Janat, aqyn, Halyqaralyq «Alash» syılyǵynyń ıegeri, «Juldyz» jýrnalynyń bas redaktory Ǵalym Jaılybaı, fılologııa ǵylymdarynyń kandıdaty, zeınollatanýshy, «Sýleımen Demırel» ýnıversıtetiniń dosenti Joldasbek Mámbetovter qatysty. Jáne QR Mádenıet qaıratkeri, «Zeınolla Sánik» atyndaǵy mádenıet qorynyń atqarýshy dırektory Serik Qalıev, jýrnalıst, «Zeınolla Sánik» atyndaǵy mádenıet qorynyń qyzmetkeri Jarqyn Sálenuly syndy tulǵalarymyz arnaıy kelip, semeılik oqyrmandarmen júzdesýde,-dedi Abaı kitaphanasy dırektorynyń orynbasary Gúlmıra Aıazbaeva,-sharany M.Tólebaev atyndaǵy mýzykalyq kolledjdiń stýdentteri Abaı shyǵarmalarynan ádebı-sazdy kompozısııany oryndaýmen ashqany kóńilge qonymdy boldy. Qatysýshylar jazýshynyń ómiri men shyǵarmashylyǵy týraly derekti fılmnen úzindi tamashalady.
Shara barysynda aqyn Ǵalym Jaılybaı jazýshy Zeınolla Sánik pen jazýshynyń jary Shámshabaný Hamzaqyzynyń shyǵarmalaryn jan-jaqty taldap, oqyrmandarǵa tanystyrdy. Zeınollatanýshy ǵalym Joldasbek Mámbetov halqymyzdyń bar bolmysyn, ádet-ǵuryp, salt-dástúr, dúnıetanymy men rýhanı álemin jan-jaqty zerdeleýge baǵyt beretin qalamgerlerdiń úlken izdenispen týdyrǵan shyǵarmalary jaıly jazǵan, bıylǵy jyly Almatydan «Qazaq ýnıversıteti» baspasynan jaryq kórgen «Zeınolla Sániktiń shyǵarmashylyq murasy» atty monografııalyq eńbegin syıǵa tartty.
Shákárim atyndaǵy memlekettik ýnıversıtettiń oqytýshylary fılologııa ǵylymdarynyń doktory, professor Arap Espenbetov, ,professor Muhtarbek Kárimov, qazaq fılologııa fakýltetiniń dekany, professor Aıbar Qadyrov, M.Qozybaev atyndaǵy tarıhı zertteýler ǵylymı ortalyǵynyń jetekshi mamany M.Asylbekov, fılosofııa jáne saıasattaný kafedrasynyń meńgerýshisi, fılosofııa ǵylymdarynyń kandıdaty, professor Mahmut Túıebaevtar jazýshy Zeınolla Sánik pen jary Shámshabaný Hamzaqyzynyń shyǵarmalaryn talqylap, qalamgerlerdiń shyǵarmashylyq qyryn asha tústi. Atalmysh shara Semeı halqy úshin asa rýhanı, mańyzdy shara boldy. Shara sońynda kitapsúıer qaýymǵa kitaptar syıǵa tartyldy.
Raýshan Nuǵmanbekova,
Semeı
Sýretter avtordyki