Taıaýda Qaraǵandy oblystyq Bilim basqarmasynyń bastamasymen, óńirdegi bilim berý mekemeleriniń barlyǵynda Jas ulandar kúni atalyp ótti. Ony uıymdastyrǵan – «Jas ulan» balalar men jasóspirimder qozǵalysy men «Saryarqa daryny» ǵylymı-tájirıbelik ortalyǵy.
Jas urpaqqa arnalǵan merekelik shara osymen ekinshi jyl ótkizilip otyr. «Jas ulan» uıymynyń maqsaty: óskeleń urpaqty patrıottyqqa, bilim men ózin-ózi jetildirýge degen qushtarlyqqa, Otan tarıhyna, táýelsiz Qazaq eliniń búgini men bolashaǵyna degen jaýapkershilikke tárbıeleý. Elbasy N.Nazarbaevtyń «Bolashaqqa baǵdar: rýhanı jańǵyrý» baǵdarlamasynyń sheńberinde uıymdastyrylǵan ataýly kún bıyl elordanyń 20 jyldyq mereıtoıyna oraı «Asqaqtaǵan Astanam!» taqyrybymen ótti.
Aýqymdy sharanyń barysynda «Jas ulannyń» qataryna jańa músheler alynyp, olar ant qabyldady. Kópshilik merekelik konsertpen qatar, jas ónertapqyshtardyń kórmesin, sporttyq jarystardy tamashalady.
«Jas ulannyń» mindeti – qazaq halqynyń tilin, mádenıetin, tarıhyn bilý negizinde óskeleń jas urpaqtyń boıynda rýhanı-adamgershilikti qalyptastyrý, balalar men jasóspirimderdiń azamattyq belsendiligi men sanalylyǵyn arttyrý, tanymdyq jumystardy yntalandyrý, balalar men jasóspirimderdiń zııatkerlik, shyǵarmashylyq jáne áleýmettik damýy úshin jaǵdaı jasaý, jaýapkershilik pen eńbeksúıgishtikti qalyptastyrýǵa, kóshbasshylyq jáne uıymdastyrýshylyq qabiletterin damytýǵa baǵyttalǵan sharalar ekenin eskersek, ataýly kún de osy maqsatty kózdegen ıgi sharalarǵa toly boldy. Saltanattarǵa elimizdiń damýyna úles qosqan, óskeleń urpaqqa kórseter úlgisi, aıtar aqyly mol tulǵalar, úzdik otbasylar, qurmetti azamattar arnaıy qatysty.
Qaırat ÁBILDA, «Egemen Qazaqstan»
QARAǴANDY