Elimizdegi eń úlken qalanyń biri desek te, Qaraǵandy shahary ózine laıyq kólemdegi konsert zalyna zárý edi.
Aýqymdy sharalar men qala qonaqtarynyń konsertteri ámbebap shańyraqqa aınalǵan Kenshiler mádenıet saraıynda, sırk arenasynda, tipti stadıonnyń ashyq alańynda ótkiziledi. Endi, mine, osy máseleni sheshýdiń de reti kelgen syńaıly. Jańa konsert zalyn turǵyzýǵa Qaraǵandynyń bedeldi sanalatyn Ońtústik-shyǵys aýdanynan aýqymdy jer bólinip, biraz ýaqyt buryn ǵımarat jobasyna baıqaý jarııalanǵan bolatyn. Osy synda qaraǵandylyq jas sáýletshi Ernar Nurmuqanovtyń jobasy úzdik dep tanyldy.
– Alǵashqyda konsert zaly ǵımaraty dala tasynyń pishininde bolsa dep oılaǵam, – deıdi Ernar. – Ulttyq bolmysymyzǵa jaqyn dúnıe ǵoı. Alaıda ol qalanyń jalpy kórinisimen úılese qoımas degen paıymǵa kelip, ǵımarat klassıkalyq úlgide bolýy tıis dep sheshtim.
Tórt qabatty jańa konsert zalynyń jobasy kóne grek Parfenonyn eske salady: ǵımarat tórt jaǵynan da kolonnalarmen ásemdeledi. Ǵımarattyń úlken zalyna bir mezgilde 1 250 kórermen, al daıyndyq zalyna 400 adam syıady. Baıqaý shartyna sáıkes, bolashaq ǵımarattyń aldynda kún jylyda túrli sharalar ótkizýge bolatyn úlken alań bolady.
Qaraǵandy oblysynyń ákimi Erlan Qoshanov Qurylys, sáýlet jáne qala qurylysy basqarmasyna jobalaý-smetalyq qujattamalardy ázirleýge tapsyrma berdi.
– Qurylys jumystaryn bastaýǵa qajetti qujattar men saraptamalyq sharalardy rettep, qarjylandyrý kózderi kelisilgen soń, kúz aılarynda iske kirisýge bolady, – deıdi atalǵan oblystyq basqarma basshysynyń mindetin atqarýshy Taıhan Qalmahanov.
Jalpy, jańa konsert zaly jobalarynyń baıqaýyna túrli stıldegi on bir jumys qatysqan bolatyn. Solardyń árqaısysy ózindik sáýletimen erekshelenedi. Degenmen solardyń ishinde jas darynnyń aty ozdy. Ázirge ústel ústinde turǵan joba endi birer jyldyń ishinde eńseli ǵımaratqa aınalyp, halyqtyń ıgiligine qyzmet eterine senim mol.
Qaırat ÁBILDA,
«Egemen Qazaqstan»
QARAǴANDY