Oral qalasyndaǵy №20 mekteptiń 4 synybynda oqıtyn Nuráli О́teǵalıev Fransııada ótken IV halyqaralyq art-festıval – «Young cannes stars» («Kannyń jas juldyzdary») atty án baıqaýynda 1-oryndy jeńip aldy.
Mektepten tys jumystar ortalyǵynda Svetlana Goncharova men Aqmaral Ahmetovadan akterlik sheberlik jáne vokal janry boıynsha sabaq alyp júrgen Nuráli 6 jasynan bastap úlken sahnalarǵa shyǵa bastapty. О́tken jyly Reseıdiń Qazan qalasyndaǵy án baıqaýynda – 2-oryn, Pısýnda qalasyndaǵy án dodasynda – 1-oryn alsa, Astanada ótken «Aq kógershin» baıqaýynyń da 1-oryn ıegeri atanǵan.
– Kanndaǵy báseke óte tartysty ótti, – deıdi jas ánshiniń naǵashy ájesi, túrli jarystarǵa aparyp, janynda júretin Gúlshat Jandáýletova.
7-9 jas aralyǵynda óner kórsetken balǵyn ónerpazdar arasynda Nuráli Qazaqstannyń namysyn jalǵyz ózi qorǵaǵan. Qazylar alqasynyń tóraǵasy, fransýz kompozıtory Patrık Nebbýla qazaqstandyq ánshiniń óte jaqsy daıyndyqpen kelgenin, sahnalyq kostıými jáne repertýary ónerpazdyń jasyna saı bolǵanyn basa aıtypty. «Nuráliniń boıynda úlken talant bar. Jalǵyz ótinishim – Nuráli án aıtýyn tastap ketpese eken» depti Kann konservatorııasynda ustazdyq etetin Patrık Nebbýla.
Nuráli halyqaralyq án baıqaýynyń fınalynda oraldyq qalamger Mıra Shúıinshálıevanyń sózine jazylǵan sazger Ádilbek Súleımenovtiń «Qazaqstan jas ulany» atty ánin shyrqaǵan. Nuráliniń ata-anasy Arystan men Márııa da áskerı qyzmetker bolǵandyqtan shyǵar, jas ánshi de marsh stılindegi rýhty shyǵarmany jan-tánimen oryndasa kerek.
Nuráli О́teǵalıev endi Sank-Peterbýrg qalasynda 2018 jyly 3 qazanda ótetin sýper-fınalǵa shaqyrtý alyp otyr. Fransııadaǵy baıqaýdan keıin jas ánshini túrli baıqaýlarǵa shaqyrta bastapty. Solardyń biri – aldaǵy 21-23 maýsymda Brest qalasynda ótetin án festıvali.
– Biz Fransııaǵa óz qarjymyzben baryp keldik. Osy baıqaýǵa qatysqan ózge ónerpazdardyń janynda ustazdary, ata-anasy, tipti psıhology bar jankúıer top júrgenin kórip, qatty qyzyqtym. Mundaı qamqorlyq, qoldaý bolsa, bizdiń jastarymyz talaı bıikti baǵyndyratyny anyq qoı, – deıdi Nuráliniń naǵashy ájesi Gúlshat Jandáýletova.
Qazbek QUTTYMURATULY,
«Egemen Qazaqstan»
ORAL