О́tken ǵasyrdyń alpysynshy jyldary Almatydaǵy M.Áýezov atyndaǵy akademııalyq drama teatrynda qoıylǵan Qanabek Baıseıitov pen Qýandyq Shańǵytbaevtyń «Beý, qyzdar-aı!» týyndysy qazaq komedııalarynyń ishinde klassıkalyq deńgeıge jetken spektakl. Ákemteatr ártisteriniń kópshiliginiń bul qoıylymnan soń juldyzy janyp, shabytynyń sharyqtaǵany da belgili. Ádemi ázilmen órilip, jastar arasyndaǵy mahabbatty beıneleıtin komedııanyń kórkemdigi men shynaıylyǵy kúni búginge deıin mańyzyn joıǵan joq.
Jambyl oblystyq qazaq drama teatrynda «Beý, qyzdar-aı!» komedııasynyń tusaýkeseri boldy. Áýelden ádemi ázilmen bastalyp, ásem ánmen ádiptelgen spektakl aqyn jigit Áýbákir (Mámbet Qojalıev), sýretshi jigit Sultan (Jandar Qyryqbaev) jáne magıstrant jigit Hasenniń (Abzal Dáýletbaqov) ózara áńgimelesýimen bastalady. О́nerli úsh jigit te ómirlik jar izdegen jandar. Biri aqyndyq, biri sýretshilik, endi biri ǵylym jolyna túsken jigitterdiń ómirin ózgertip, kóńilin kórkem kúıge bólegen Aısulý esimdi beıtanys qyz. «Kóktóbe» kolhozynda saýynshy bolyp eńbek etetin Aısulýdyń sýreti gazetke basylady. Ádemi qyzdyń sýretin kórgen boıda esi ketken úsh jigit bir-birine aıtpaı Almatydan Aısulýdy izdep «Kóktóbege» keledi.
Árıne arman asqaq, úmit zor. Úsh jigittiń de ańsaǵany − aıdaı sulý Aısulý. Aýyldaǵy saýynshy Aısulý (Almıra Dildá), Kúnsulý (Jadyra Qultaeva), Jansulý (Indıra Mustafaeva) jáne Nursulý (Rızat Qylyshbaeva) beıneleri de tartymdy shyqqan. Biraq qaladan kelgen úsh jigitti baıqaǵan aýyldaǵy sharýashylyq bastyǵy (Ábý Shońbaev) pen polısııa qyzmetkeri (Anar Altybaeva) bir qýlyq qoldanyp, olardy Aısulýmen emes, Kúnsulý, Jansulý, Nursulýlarmen tanystyrady. Árıne olar da «buıryq» boıynsha jigittermen Aısulý bolyp tanysady. Aqyry Aısulý atyna ılanǵan úsh jigit úsh saýynshy qyzben kóńil jarastyrady. Al Aısulý óziniń súıgen jigiti Serkemen (Beksultan Álekeshov) taǵdyr qosady.
«Beý, qyzdar-aı!» komedııasy ótken ǵasyrda jazylǵan shyǵarma. Alaıda bul qoıylymnyń ereksheligi – munda búgingi zamannyń basty oqıǵalarynyń oryn alýy. Qoıylymnyń qoıýshy-rejısseri Rústem Janamanovtyń shyǵarmashylyq sheshimi negizinde oqıǵa barysynda búginde elimizde bastaý alǵan «Dıplommen − aýylǵa!» baǵdarlamasy kórinis beredi. Sondaı-aq rejısserdiń sheshimi men akterlerdiń sheberligi úndesip, búginde jumysbastylyqpen turmys qurmaı júrgen qyzdardyń jaıyn da ádemi ári astarly ázilmen aıshyqtaıdy. Al komedııanyń sýretshisi – Jambyl oblystyq qazaq drama teatrynyń bas sýretshisi Rahat Saparalıevanyń eńbegi sahnanyń ón boıynan kórinip turdy.
Hamıt ESAMAN,
«Egemen Qazaqstan»
Jambyl oblysy