Memleket basshysy plenarlyq otyrysta sóılegen sózinde Astana ekonomıkalyq forýmyna qatysý kópshilik úshin ıgi dástúrge aınalǵanyn atap ótti.
– On birinshi ret ótkizilip otyrǵan bul forým ekonomıkanyń, ınvestısııanyń jáne ınnovasııanyń meılinshe ózekti máselelerin talqylaýǵa arnalǵan. Bıylǵy forým jahandyq syn-tegeýrinderge laıyqty jaýap tabý máselelerin de qarastyrady, – dedi Qazaqstan Prezıdenti.
Nursultan Nazarbaev shıelenisti jaǵdaılardyń kóbeıgenine jáne qazirgi órkenıettiń jańa jahandyq transformasııasyna toqtalyp, ǵalamdyq damýdyń basty bes megatrendin atap ótti. Olardyń qatarynda adam qyzmetiniń barlyq salalaryn sıfrlandyrý, energetıkalyq revolıýsııa, jer sharyndaǵy turǵyndar sanynyń jyldam ósýi, ýrbanızasııa qarqyny men sıpatynyń jáne jahandyq eńbek naryǵynyń ózgerýi bar.
Memleket basshysy ekonomıkanyń jańa sıfrlyq modeliniń nátıjesi onyń ulǵaıýyna ǵana emes, sondaı-aq 2017 jyly bıznes úshin eń qaýipti dep tanylǵan kıberqaýipsizdiktiń artýyna da baılanysty ekenin aıtty.
– Biz de osy jańa jaǵdaıǵa beıimdelip kelemiz. «Sıfrlyq Qazaqstan» baǵdarlamasyn iske asyrý arqyly elimizde sıfrlyq ınfraqurylymnyń jáne IT-ekojúıesiniń damýy qamtamasyz etilip, turǵyndardyń 85 paıyzynyń sıfrlyq saýattylyǵy artady. Biz jańa tehnologııalardy qoldana otyryp, 5 jyl ishinde óńdeý sektoryndaǵy eńbek ónimdiligin 1,5 ese arttyrýdy josparlap otyrmyz, – dedi Qazaqstan Prezıdenti.
Sonymen qatar, Nursultan Nazarbaev jıynǵa qatysýshylarǵa Qazaqstanda «jasyl» ekonomıkany júıeli túrde damytýdyń negizine aınalǵan «Bolashaqtyń energııasy» taqyrybymen uıymdastyrylǵan «EKSPO-2017» halyqaralyq kórmesiniń qalaı ótkeni jóninde áńgimeledi.
Memleket basshysy jer shary turǵyndarynyń sany jyldam ósip kele jatqanyna toqtalyp, bazalyq resýrstardyń shekteýli ekenine jáne aýyz sý tapshylyǵynyń artýyna baılanysty azyq-túlik óndirisin kóbeıtý qajettigin aıtty.
– Agroónerkásip kesheniniń ónimdiligi men resýrstardy paıdalaný tıimdiligin aıtarlyqtaı arttyrý qajet. Bul sala endi joǵary tehnologııalyq salalardyń birine aınalýǵa tıis. Qazaqstanda zamanaýı jetistikterdi qoldana otyryp, 5 jylda agroónerkásip kesheniniń ónimdiligin 2,5 ese arttyrý maqsaty qoıylyp otyr , – dedi Qazaqstan Prezıdenti.
Sonymen birge, Nurultan Nazarbaev Qazaqstanda aglomerasııalardy damytý jónindegi strategııa iske asyrylyp jatqanyn, sondaı-aq Astananyń 20 jyldyǵyn merekeleý barysynda ótetin Jibek joly elderi iri qalalarynyń forýmy týraly aıtty.
Memleket basshysy jahandyq eńbek naryǵynyń transformasııalaný máselesine toqtalyp, kreatıvti oılaý qabiletin qalyptastyrýǵa, qajetti aqparatty taýyp, ony durys qoldaný qabiletterin jetildirýge baǵyttalǵan bilim berý salasyn reformalaý jóninde Qazaqstan tarapynan qabyldanyp jatqan sharalarǵa nazar aýdardy.
– Biz memleket qalyptastyrý isiniń bastaýynda «Bolashaq» baǵdarlamasyn júzege asyrýǵa kiristik. Sol arqyly 13 myń qazaqstandyq memleket esebinen álemniń úzdik ýnıversıtetterinde oqýǵa múmkindik aldy. Sonymen qatar, elimizde álemdik deńgeıdegi ýnıversıtetter ashyldy. Olardyń qatarynda Nazarbaev Ýnıversıteti, Qazaqstan-Brıtan tehnıkalyq ýnıversıteti, Qazaqstandyq menedjment, ekonomıka jáne boljaý ınstıtýty jáne Halyqaralyq aqparattyq tehnologııalar ýnıversıteti bar. Jańa «Bes áleýmettik bastama» arqyly oqý granttarynyń sany kóbeıip, stýdent jastardyń turmys jaǵdaıy jaqsarady, – dedi Qazaqstan Prezıdenti.
Nursultan Nazarbaev atalǵan jahandyq 5 trend álemde oryn alyp jatqan turaqsyzdyq jaǵdaıynyń arta túsýiniń negizgi faktorlary bolyp sanalatynyn jáne G-Global bastamasyn usynǵanyn atap ótti. Bul bastama G-7 jáne G-20 bastamalaryna qaraǵanda, barlyq elderdiń pikirleri men múddelerin biriktirýge múmkindik berip, meılinshe teńgerimdi sheshimder tabýdyń naqty tetigine aınala alady.
– Osy basqosýda ornyqty damý, ekonomıkalyq teńsizdikti qysqartý, halyqaralyq saýda-sattyqtyń, jalǵan aqparat taratýdyń, krıptovalıýtany qoldaný men ony retteýdiń jańa erejelerin aıqyndaý máselelerin talqylaýǵa bolady. Jahandyq daǵdarysqa qarsy sheshimder ázirleý isine búkil halyqaralyq qoǵamdastyqtyń atsalysýy qajet ekenin eskerip, bul bastamany Birikken Ulttar Uıymy aıasyndaǵy alańda júzege asyrýdy usynamyz, – dep túıindedi Memleket basshysy.
Sońynda Qazaqstan Prezıdenti sharaǵa qatysýshylarǵa tabys tilep, forým jumysy nátıjeli ári jemisti bolatynyna senim bildirdi.
Sýretterdi túsirgen Erlan OMAROV,
«Egemen Qazaqstan»