«V nas vselıaıýt lıýbov» atty Batyrhan Shúkenovtyń esh jerde oryndalmaǵan 11 áni engen albom 20 mamyr kúni jaryqqa shyǵady. Bul jaıynda B.Shúkenov atyndaǵy «Otan – Ana» atty II respýblıkalyq ánshiler konkýrsy aldynda ótken baspasóz konferensııasynda qor dırektory Oljas Baıkanov málimdedi.
Esterińizge sala ketsek, konkýrs Qyzylorda qalasynda ótýde. «Otan – Ana» konkýrsyna arnalǵan baspasóz konferensııasyna Dılnaz Ahmadıeva, Rınat Gaısın, Rústem Nurjigit, Saǵynaı Abdýlın jáne Erjan Ábdrahmanov qatysty.
- Sońǵy jyly biz Batyrdyń jańa albomy boıynsha jumys jasap jatyrmyz. Bul jınaqqa buryn-sońdy eshkim estimegen 11 jańa áýen enedi. Al, 20 mamyr kúni Máskeýden ánder jınaqtalǵan dısk jetkiziledi. Bul jınaqqa Qazaqstan ǵana emes, kóptegen elderdiń mamandary birlesken úlken top jumys jasady, - dedi Oljas Baıkanov.
Sonymen qatar, Batyrhan Shúkenovpen tyǵyz áriptestik jumys jasaǵan kompozıtor Rınat Gaısın ánshiniń taǵy da birneshe ánin óńdep, jańartyp shyǵaratynyn jetkizdi.
- Biz uzaq ýaqyt birlesip jumys jasadyq. Men Batyrǵa arnap birneshe án shyǵardym. Máselen, búgingi konkýrsta oǵan arnap jazǵan "Astana" áni oryndalady. Konkýrs aıaqtalǵan soń, men Pragaǵa baryp, stýdııa arhıvinde saqtaýly Batyrdyń birneshe ánin jańartyp, qaıtadan óńdeımin. Qandaı án ekenin ázirge aıtpaımyn, qupııa bolyp qala bersin, - dedi Rınat Gaısın.
Esterińizge sala ketsek, Qyzylordada 16-18 mamyr kúnderi oblys ákimdiginiń qoldaýymen B.Shúkenov atyndaǵy «Otan – Ana» atty II respýblıkalyq ánshiler konkýrsy ótýde.
Oǵan elimizdiń barlyq óńirlerinen jáne О́zbekstan memleketinen 25 oryndaýshy qatysýda.
Konkýrs talaby boıynsha, qatysýshylar 2 án oryndaıdy, onyń biri Batyrhan Shúkenovtyń repertýarynan bolýy kerek.