L.Tolstoı atyndaǵy Qostanaı oblystyq ámbebap kitaphanada «Rýhanı jańǵyrý» baǵdarlamasy aıasynda Amankeldi aýdanynyń kúnderi ótti. Ol aýdannyń bıylǵy 90 jyldyq mereıtoıyna arnaldy.
Shara aıasynda oblystyq kitaphana oqyrmandary aýdan tarıhyna, ólketanýǵa arnalǵan «Qandaı kórkem, týǵan ólkem!» atty jáne ulttyq taǵamdar kórmesin tamashalady. Oblystyq mádenıet basqarmasynyń basshysy Erlan Qalmaqov ótken jyly bastalǵan «Kitaphana kúnderi» jobasyn Amangeldi aýdanynyń jalǵastyrǵanyna rızashylyǵyn bildirdi.
«Bir kún ǵana ótetin shara bolǵanymen onyń ishki mazmuny keń. Oqyrmandar osy aýdannyń tarıhyna, búgingi jetistikterine qatysty maǵlumattarǵa qanyǵady, aýyldaǵy mádenı ortalyq–kitaphananyń atqaryp jatqan jumystarymen tanysamyz, osy aýdan óńirinen shyqqan halqymyz qaıratkerleriniń, óner juldyzdarynyń, eńbek maıtalmandarynyń ómiri men shyǵarmashylyǵyna qatysty taǵylymdy kezdesýlerdiń kýási bolamyz. Osynyń barlyǵy da jurtshylyqqa rýhanı serpilis beredi» dedi Erlan Bolatuly.
Amangeldi aýdandyq kitaphanasy kúnderi sheńberinde kitaphana qyzmetkerleri kelýshilerge mádenı oshaqtyń sońǵy jyldary damýy, jetistikteri týraly aıtyp berdi.
«Qazir Amangeldi aýdanynda 23 kitaphana jumys isteıdi. Amantoǵaı aýylynda modeldik kitaphana ashyldy, ortalyq kitaphanada sıfrldandyrýǵa oraı zamanaýı bıýaǵdarlamamen jumys isteı bastadyq. Aldaǵy ýaqytta «Sıfrlyq Qazaqstan» baǵdarlamasyna oraı aýdandaǵy taǵy tórt kitaphanany elektrondaý jumystary, ol úshin sıfrlyq apparattar alýǵa aýdanda qarjy qarastyrylyp jatyr. Aýdanda 18 myń turǵynnyń 11 myńy bizdiń kitaphanalardyń oqyrmandary. Kitaphana aýyldaǵy birden bir mádenı oshaqqa aınalǵan» dedi Amangeldi aýdandyq ortalyq kitaphananyń dırektory Kórkem Musabaeva.
Amangeldi aýdandyq kitaphanasynyń oblys ortalyǵyndaǵy kúnderi sheńberinde Qazaqstannyń halyq ártisi Ánýar Boranbaevty eske alý keshi ótti.
Názıra Járimbet,
«Egemen Qazaqstan»
Qostanaı