IýNISEF Qazaqstandaǵy densaýlyq saqtaý jáne áleýmettik qorǵaý júıelerin sıfrlandyrýdy ilgeri bastyrý úshin hakaton ótkizedi. Almatyda 18-19 mamyr kúnderi ótetin hakatonǵa Almaty qalalyq ákimdigi men Halyqaralyq Aqparattyq Tehnologııalar Ýnıversıteti at salysyp, «Densaýlyq saqtaý jáne áleýmettik qorǵaý ekojúıesin sıfrlandyrý. Blokcheın» taqyrybynda uıymdastyrady.
Bul shara – densaýlyq saqtaý jáne áleýmettik qorǵaý júıeleri úshin ınnovasııalyq sheshimder oılap tabý, sonymen birge, ınnovasııalyq sheshimderdi jastar arasynda ilgeri bastyrýdy kózdeıdi.
Hakatonǵa qatysý úshin Astana, Almaty, Qaraǵandy jáne Aqtóbe qalalarynan 20 komanda, sondaı-aq, Qyrǵyzstannan eki komanda tańdaldy, olar 6 ýnıversıtet, azamattyq qoǵam jáne bıznes-ınkýbatorlar atynan ókildik etedi. Jeńimpazdar syılyqtarmen marapattalady jáne jobasyn júzege asyrý múmkindigin alady.
Hakaton taqyryptary:
1. Medısınalyq maqsatta qoldanylatyn dárilik quraldardy jáne buıymdardy (MQQ DQ jáne B) qadaǵalaý.
2. Sozylmaly syrqattarǵa shaldyqqan naýqastarǵa qashyqtan monıtorıng júrgizý.
3. Otadan keıingi monıtorıng.
4. Áleýmettik turǵydan áljýaz halyq toptarynyń biryńǵaı derekqoryn (ÁÁHT) qurý.
Aınash ESALI,
«Egemen Qazaqstan»
ALMATY