Bes birdeı eldiń: Reseı, Qazaqstan, Germanııa, Polsha men Qytaıdyń kınoónimi bolyp tabylatyn «Aıka» fılmi 71-shi Halyqaralyq Kann kınofestıvaliniń negizgi baıqaýyna qatysýda. Atalmysh kartınada basty róldi Samal Eslıamova somdaıdy. Al prodıýserler qatarynda Eurasia Film Production kınokompanııasynyń negizin qalaǵan Gúlnara Sársenova da bar. Bul az deseńiz, fılm rejısseri – Sergeı Dvorsevoıdyń da kindik qany Ońtústik Qazaqstanda tamǵan.
– Basqa da kartınalardy túsirýge qatar usynystar túsip jatsa da, bir fılmmen ǵana aınalysamyn. Men qazir barlyǵynan da bas tarttym. О́ıtkeni «Aıkany» aıaqtaýym kerek. Búginde tek osymen ǵana aınalysyp otyrmyn, – deıdi kartına rejısseri.
Bir qyzyǵy, bul kartına tolyq túsirilip bitpeı jatyp-aq Kann kınofestıvaliniń basty baıqaýyna shaqyryldy. Irikteýshiler tolyq túsirilip bitpegen fılmniń alǵashqy 40 mınýtyn kórgennen keıin, birden ony kınofestıvalge qatystyrýǵa sheshim qabyldaǵan.
Fılm ssenarııin jazǵan Gennadıı Ostrovskıı de bitpegen kartınanyń Kann kınododasynan tabylýynyń ózi kóp jáıtti ańǵartatyn alǵa tartady. Túsirý toby taǵy bir qupııanyń shetin ashyp otyr. Atalmysh kartına kınofestıvalge tek 17 mamyrdyń keshinde ǵana jetedi. Al kınofestıval 19 mamyrda márege jetetindigin eskersek, bul – óte úlken táýekel.
Qazaqstandyq prodıýser Gúlnara Sársenova Sergeı Dvorsevoıdyń 2008 jyly Kann kınofestıvaliniń «Erekshe kózqaras» baıqaýynda bas júlde alǵan «Jaýqazyn» dep atalatyn fılmine de prodıýserlik etken. Al Aýstralııada bul fılm «Azııalyq Oskar» ıemdense, basqa da 20 shaqty kınofestıvalde túrli ataýly júldelerdi jeńip aldy.
«Aıka» áleýmettik kınodramasy Máskeýde jumys istep júrgen qyrǵyz qyzynyń ishki qarama-qaıshylyqtarymen kúresin, rýhyn áıgili etedi. Basty rólde oınaıtyn Samal Eslıamova Soltústik Qazaqstan oblysynda dúnıege kelgen. Petropavldaǵy óner kolledjin aıaqtaǵan soń, GITIS-ke qabyldanady. Samal Sergeı Dvorsevoıdyń «Jaýqazyn» fılminde basty rólderdiń birin beınelegen bolatyn.
Aınash ESALI, «Egemen Qazaqstan»
ALMATY