Belgili ǵalym Serik Negımovtiń shyǵarmashylyq jolyna úńiletin bolsaq, únemi izdenis ústinde kele jatqan tynymsyz eńbek adamy ekenin aıqyn ańǵarýǵa bolady. Oǵan Qazaqstan áleýmettik ǵylymdar akademııasy akademıginiń, fılologııa ǵylymdary doktorynyń «О́leń ómiri», «Aqyn-jyraýlar poezııasynyń beıneliligi», «О́nerpazdyq órnekteri», «Sheshendik óner», «Halyq aqyndary tvorchestvosynyń kórkemdik sıpaty», «Qazaq óleńderiniń kórkemdigi», «Aqyn-jyraýlar poezııasy: Genezıs. Stılıstıka. Poetıka», «Qazaqtyń sal-serileri», taǵy basqa kóptegen monografııalary dálel.
Onyń zertteý taqyryby ár alýan. Qazaq aýyz ádebıetinen bastap til, lıngvıstıka, ádebıet teorııasy, sheshendik óner, sal-seriler poezııasy máselelerine qatysty aıtqan qundy oı-pikirleri ómirsheńdigimen, mańyzdylyǵymen erekshelenedi. Ol túrki mádenıetiniń, Jambyl Jabaev, Máshhúr Júsip, Málik Ǵabdýllın muralarynyń bilgiri sanalady. Ǵylym men ustazdyq qyzmetti tyǵyz ushtastyra bilgen san qyrly talant ıesiniń ulttyq ádebıettaný ǵylymyna qosqan úlesi ólsheýsiz.
Jetpis jastyń tórine kóterilgen jerlesimizdiń qurmetine M. Qozybaev atyndaǵy Soltústik Qazaqstan memlekettik ýnıversıtetinde «Qazirgi folklortaný men ádebıettanýdyń kókeıkesti máseleleri» atty respýblıkalyq ǵylymı-tájirıbelik konferensııa uıymdastyrylyp, Astana, Shymkent, Qaraǵandy, Kókshetaý taǵy basqa qalalardan joǵary oqý oryndarynyń ókilderi, sóz zergerleri, ádebıettanýshylar qatysty. Alqaly basqosýda ulaǵatty ustaz, kórnekti ǵalymnyń ómiri men shyǵarmashylyǵyna qatysty ózgelerge úlgi bolarlyq taǵylymdy áńgimeler qozǵaldy.
Tilderdi damytý jónindegi basqarmanyń basshysy Kemel Ospanov oblys ákimi Qumar Aqsaqalovtyń júrekjardy quttyqtaý lebizin jetkizip, arnaıy syı-sııapat kórsetti. Eńseli oqý ornynyń ǵylym jáne ınnovasııalar jónindegi prorektory Aqmaral Ibraeva «M. Qozybaev atyndaǵy Soltústik Qazaqstan memlekettik ýnıversıtetiniń qurmetti professory ataǵyn berý týraly» kýálikti saltanatty jaǵdaıda tabys etti. Parlament Májilisiniń depýtaty Abaı Tasbolatovtyń quttyqtaý haty oqyldy. «Qyzyljar-Aqparat» JShS dırektory-bas redaktory Jarasbaı Súleımenov óz sózine eńbegimen elge tanylǵan tulǵanyń bilikti, bilimdi, izdenimpaz qasıetterin arqaý ete kelip, ádebıet degen ǵajaıyp álemdegi ózindik tuǵyryn, jetken asýyn, baǵyndyrǵan belesin alǵa tartty. Basylymnyń atynan mereıtoı ıesiniń ıyǵyna shapan japty. Ýálıhanov aýdandyq ardagerler keńesiniń tóraǵasy Sansyzbaı Qalıev, ýnıversıtet professory Zarqyn Taıshybaı, memlekettik muraǵattyń dırektory Sáýle Málikova ǵalymnyń ǵylym jolyndaǵy qoltańbasyn bólip aıtty.
L.Gýmılev atyndaǵy Eýrazııa ulttyq ýnıversıtetiniń prorektory, fılologııa ǵylymdarynyń doktory Dıqan Qamzabektiń «Serik Negımov jáne Alash murasy» atty baıandamasy óte áserli shyqty. Onda ǵalymnyń jıyrmasynshy ǵasyrdaǵy qazaq ádebıetin indete zerttegen shyǵarmalary taldanyp, joǵary baǵa berildi. Memlekettik Eltańbanyń avtory, Qazaqstannyń eńbek sińirgen qaıratkeri Jandarbek Málibekuly zamandasyn óndirtip jazatyn ǵalymdar shoǵyryna qosty. Qaı taqyrypqa qalam tartsa da ǵylymı oqshaý oılary, tabandy pikirleri tánti etetinin jetkizdi. M. Áýezov atyndaǵy Ádebıet jáne óner ınstıtýty ádebıet tarıhy bóliminiń meńgerýshisi Serikqazy Qorabaı, S.Toraıǵyrov atyndaǵy Pavlodar memlekettik ýnıversıtetiniń professory Nartaı Júsipov, J.Mýsın atyndaǵy Kókshetaý pedagogıkalyq kolledjiniń dırektory Nurtas Ahat, ózge de sheshender ǵalymnyń aqyn-jyraýlar poezııasy, bı-sheshender tolǵaýy, sheshendik óner haqynda dáıektilikpen, biliktilikpen zerttep, birizge túsirip, júıelep bergen bilgir zertteýshi ekenine naqty mysaldar keltirdi.
Belgili aıtysker aqyn, L.Gýmılev atyndaǵy Eýrazııa ulttyq ýnıversıtetiniń dosenti Serikzat Dúısenǵazın ustazynyń jas býynǵa úlgi eterlik qasıetterin óleńmen órnektedi.
Osylaısha ǵylymnyń qııa jolynda óz soqpaq-súrleýin taýyp, ulaǵatty ustaz, kórnekti ǵalym retinde keńinen tanylyp otyrǵan jerlesimizdiń mereıtoıyn Qyzyljar jurtshylyǵy óz máninde atap ótti.
О́mir ESQALI, «Egemen Qazaqstan»
Soltústik Qazaqstan oblysy