Aqorda, Báıterek, Han Shatyr, Beıbitshilik jáne kelisim saraıy, Mınıstrlikter úıi, zamanaýı turǵyn úı kesheni sekildi sáýletti ǵımarattar Atyraýda da bar. Árıne Astanadaǵydaı aspanmen talasqan ǵajaıyp nysandar emes, bar bolǵany qaǵazdan jasalǵan kóshirme. Biraq sol qaǵaz úılerde qansha balanyń armany men mahabbaty jatyr.
Atyraýdaǵy Nazarbaev zııatkerlik mektebiniń oqýshylary Astananyń 20 jyldyǵyna arnalǵan merekelik onkúndikte elorda tórinde turǵan záýlim ǵımarattardy qoldan jasap shyqty. «Maketterdi daıyndaýǵa qalqan men jelim ǵana qajet boldy, – deıdi óner pániniń muǵalimi Danııar Oljaǵalıev. – Aldymen ár nysannyń syzbasyn jasap aldyq. Sodan soń kerek materıaldardyń kólemin anyqtadyq. Toptyq jumystyń nátıjesinde osyndaı buıymdar shyqty. Bul týyndylar balalardy qolónerge mashyqtandyrýmen qatar, matematıka men beıneleý pánderinde alǵan bilimderin tájirıbede pysyqtaýǵa múmkindik beredi».
Ǵımarattardyń ishinde erekshe kózge túsetini – «Aqorda» rezıdensııasy. Aqordany «turǵyzýǵa» oqýshylardyń on kúndeı ýaqyty ketken. Kóshirmeniń túpnusqaǵa uqsaýy úshin túrli-tústi boıaýlar men 12 volttyq dıod shamdar qoldanylypty. Makettiń salmaǵy 5 kılo. Uzyndyǵy 1,5 metr, al eni 1 metr.
Zııatkerlik mektepte Astananyń 20 jyldyǵyna oraı kórme ashyldy, ol jyl aıaǵyna deıin balalar jasaǵan buıymdarmen tolyǵady.
Baqytgúl BABASh,
«Egemen Qazaqstan»
ATYRAÝ