Qurmanǵazy atyndaǵy Qazaq ulttyq konservatorııasynyń stýdentteri aldaǵy ýaqytta jańa oqýlyqtarmen bilim alatyn bolady. Ýnıversıtettiń kitaphana qory «Jańa gýmanıtarlyq bilim. Qazaq tilindegi 100 jańa oqýlyq» baǵdarlamasy aıasynda shyqqan kitaptarmen tolyqty.
Osy oraıda Ulttyq bıýro keńesshisi Kenjehan Matyjanov, konservatorııa rektory Jánııa Áýbákirova jáne professorlyq-oqytýshylyq quramynyń qatysýymen dóńgelek ústel ótti. Jıyn barysynda kitaptardyń, oqýlyqtardyń mazmuny men mańyzdylyǵy talqylanyp, stýdentterdiń ǵylymı-zertteý jumystary boıynsha jańa jobalar men pikirler talqylandy.
Konservatorııa rektory J.Áýbákirova kitaphana qoryna tapsyrylǵan kitaptardyń sapasyna, mazmunyna qatysty pikirin bildirip, kórnekti ǵalymdardyń zamanaýı derektermen, ádistemelermen tolyqtyrylǵan oqýlyqtar stýdentter úshin erekshe tartý boldy, dep atap ótti. Aldaǵy ýaqytta jobaǵa mýzyka ónerine qatysty da oqýlyqtardy engizý týraly usynysyn bildirdi. Ulttyq bıýro keńesshisi Kenjehan Matyjanov aýdarmalar bıýrosy usynystardy qabyldaýǵa daıyn ekenin ári joba mýzykalyq ádebıettermen tolyqtyrylatyndyǵyn jetkizdi. «Jańa gýmanıtarlyq bilim. Qazaq tilindegi 100 jańa oqýlyq» baǵdarlamasynyń sheńberinde shyǵarylǵan kitaptar barlyq talaptarǵa saı ári álemdik ýnıversıtetterdiń suranysynda ıe bolýy qajet. Eger osy talaptar oryndalyp jatsa, onda qazaq tilindegi oqýlyqtar mindetti túrde shyǵatyn bolady.
Konservatorııanyń oqytýshylar quramy psıhologııa, fılosofııa, ekonomıka, dintanýǵa qatysty jańa oqýlyqtarmen tanysyp, óz pikirlerin bildirdi. Qurmanǵazy atyndaǵy QUK professory Tamara Satybaldına «Orta ǵasyr fılosofııasy» oqýlyǵyn qarap shyǵyp, qazaq tilinde oqıtyn stýdentterge qyzyǵyp otyrmyn. Tili aýyrlaý bolǵanymen, bizde ǵylymı jumystarmen aınalysyp, fılosofııany tereńnen zerttep júrgen stýdentter bar» degen pikirmen bólisti.
Eskere ketetin jaıt, memlekettik tildegi 17 jańa oqýlyq qyrkúıek aıynan oqý úrdisine engiziletin bolady.
Elvıra Serikqyzy,
«Egemen Qazaqstan»
ALMATY