WBC, WBA (Super) jáne IBO belbeýleriniń ıegeri Gennadıı Golovkın men Saýl «Kanelo» Alvares ekinshi jekpe-jek ótkizý týraly kelisimge keldi.
Meksıkalyq boksshynyń promoýteri Oskar De La Hoııa boks keshi 15 qyrkúıek kúni, ıaǵnı Meksıka eliniń egemendik alǵan kúni ótetinin málimdedi.
«Jekpe-jek 15 qyrkúıekte ótetinin qýana habarlaımyn», dep jazdy Oskar De La Hoııa Twitter paraqshasynda.
Aıta keterligi Golovkın men Alvares arasyndaǵy revansh ótkizý týraly kelissóz nebári bir jarym saǵatqa sozyldy. Bastapqyda meksıkalyq taraptyń promoýteri ESPN basylymyna bergen suhbatynda «Ekinshi kezdesý ótpeıdi, 100 paıyz», degen. Biraq bes mınýttan keıin qos tarap kelissóz ótkizý úshin ústel basyna otyrdy.
Osyǵan deıin De La Hoııa boks keshinen túsken qarjynyń 57,5 paıyzy Saýl Alvareske, al qalǵan 42,5 paıyzy Golovkınniń enshisine túsetini týraly usynys jasaǵan. Keri jaǵdaıda jekpe-jekten bas tartyp, Denıel Djeıkobstyń tarapymen kelissóz ótkizetinin jetkizdi.
Golovkın-Alvares kezdesýi qaı jerde ótetini ázirge belgisiz. Biraq meksıkalyq taraptyń ókilderi Las Vegastaǵy T-Mobile arenasyn 15 qyrkúıekke brondap qoıǵany belgili boldy.
Aıta keteıik, eki boksshynyń arasyndaǵy aıqas alǵash ret ótken jyly 16 qyrkúıekte dál osy T-Mobile arenasynda ótip, teń aıaqtalǵan. Al revansh 5 mamyrǵa josparlanǵan edi, alaıda meksıkalyq boksshynyń dopıng synamasy oń nátıje berýine baılanysty jekpe-jek ótpedi. Artynsha Alvares jarty jylǵa sporttan shettetildi. Jaza tamyz aıynda aıaqtalady.
Al Gennadıı Golovkın 5 mamyr kúni amerıkalyq Vanes Martırosıanmen judyryqtasyp, ekinshi raýndta nokaýtpen jeńdi. Osy kezdesý úshin qazaqstandyq boksshy IBF jelisi boıynsha ótetin mindetti kezdesýin keıinge shegerdi. Al jaqynda ýkraınalyq Sergeı Derevıanchenkomen mindettelgen aıqasyn ótkizý úshin qaǵaz túrinde kelisim berýden bas tartyp, IBF tıtýlynan aıyryldy.
IBF-sheshiminen keıin Golovkın meksıkalyq áriptesimen kelissózge qaıta oraldy. Qazaqstandyq boksshy bastapqyda Alvarestiń dopıng daýyna baılanysty tabysty 50-50 paıyzǵa bólý týraly talabynan bas tartty.