Qazaq poezııasynda erekshe bıikke kóterilgen áıgili lırık aqyn Maǵjan Jumabaevtyń týǵanyna bıyl 125 jyl tolyp otyr.
Aqıyq aqynnyń óleń ónerindegi ózgeshe órnegi, dara deńgeıi, talant tabıǵaty eshkimge uqsamaıdy. Al shaıyrdyń shuǵylaly shýmaqtary sóz ónerin qasterlegen halqymyz úshin máńgilik mura. Osy oraıda bıyl elimiz boıynsha «Halyqaralyq Maǵjan Jumabaev jyly» ótip jatqany belgili. Aqyn mereıtoıy aıasynda Jambyl oblystyq tilderdi damytý basqarmasynyń uıymdastyrýymen Taraz qalasyndaǵy №30 mektep-gımnazııada óńirlik «Maǵjan oqýlary» baıqaýy ótti.
Aqyn atyndaǵy baıqaýda atalǵan bilim oshaǵynyń oqýshylary «Batyr Baıan» poemasynan úzindi oqyp, ádebı keshtiń kórkin qyzdyrdy. О́z sózinde oblystyq tilderdi damytý basqarmasynyń basshysy Sulýshash Qurmanbekova Maǵjan aqynnyń muhıttaı alyp, teńizdeı tereń shyǵarmashylyǵyna toqtaldy. Atalǵan baıqaýda úmitkerlerge aqyn óleńderinen, poemalarynan úzindiler jatqa oqý jáne Maǵjan Jumabaev rýhyna óleń arnaý talaby qoıyldy. Sonymen qatar baıqaýda qatysýshylardyń til mádenıeti, oılaý júıesi, óleń mazmuny sııaqty erekshelikteri eskerildi.
Nátıjesinde «Maǵjan oqýlary» baıqaýynyń bas júldesin Baızaq aýdanyndaǵy №1 mektep-gımnazııanyń muǵalimi Aıbol Satybaldıev jeńip alsa, birinshi oryndy T.Rysqulov aýdany Sh.Ýálıhanov atyndaǵy orta mekteptiń 10-synyp oqýshysy Jánibek Ámireev ıelendi. Sonymen qatar ekinshi oryn Merki aýdanynan kelgen Aıdana Kákisheva, úshinshi oryn Qordaı aýdanynan kelgen Aıajan Tileýjan sııaqty talapkerlerge berildi. Al «Kórermender kózaıymy» bolyp talastyq Adına Dúısenbek tanylsa, shýlyq Áıgerim Saýytbekke «О́leńge ińkárlik» atalymy buıyrdy. Jeńimpazdar men júldegerler baǵaly syılyqtarmen qatar, arnaıy dıplomdarmen marapattaldy.
Aldaǵy kúz mezgilinde ótetin respýblıkalyq «Maǵjan oqýlary» baıqaýynda Aıbol Satybaldıev Jambyl óńiriniń abyroıyn asqaqtatady degen senim bar.
Hamıt ESAMAN,
«Egemen Qazaqstan»
Jambyl oblysy