«Rýhanı jańǵyrý» baǵdarlamasy aıasynda Astana qalasynyń 20 jyldyq mereıtoıyna oraı Ankarada «Uly Dala Astanasy» (Ulu Bozkır Başkenti Astana) atty kitap jaryq kórdi.
Jańa jınaq Astana qalasynyń 20 jyldyq mereıtoıyna tartý retinde Qazaqstannyń Túrkııadaǵy elshiligi tarapynan arnaıy daıyndaldy. Kitapta Túrkııanyń 11-prezıdenti Abdolla Gúl, Prezıdent Rejep Taııp Erdoǵannyń bas keńesshisi Iаlchyn Topchý, Túrkııa Uly Ulttyq Májilisiniń eks-tóraǵalary Hıkmet Chetın men Jemıl Chıchek, burynǵy Mádenıet mınıstri Namyk Kemal Zeıbek, Túrik keńesiniń burynǵy bas hatshysy Halıl Akynjy bastaǵan saıası tulǵalar, memleket jáne qoǵam qaıratkerleriniń, zııaly qaýym ókilderiniń araıly Astana men Elbasy Nursultan Nazarbaevtyń eki eldiń saıası-ekonomıkalyq baılanysyn damytýdaǵy mańyzdy róli týraly saraptamalyq maqalalary, zertteý eńbekteri jáne shynaıy pikir men jyly lebizderi berilgen.
Kitaptyń alǵysózinde Qazaqstan Respýblıkasynyń Túrkııadaǵy Tótenshe jáne ókiletti elshisi Abzal Saparbekuly «Qazaqstan Prezıdentiniń «Astana – eń aldymen azattyǵymyzdyń sımvoly, Qazaqstannyń jańa tarıhynyń shynaıy shejiresi, qarqyndy damýymyzdyń, qol jetken tabystarymyzdyń, abyroı-bedelimizdiń, bereke-birligimizdiń jarqyn kórinisi» degen ulaǵatty sózi árdaıym jadymyzdan shyqqan emes.
Qazaq jáne túrik tilinde jaryq kórgen jınaq baýyrlas elderdiń dostyǵyn kúsheıtip, senimin arttyra túsedi degen oıdamyn. Sondaı-aq aldaǵy ýaqytta Qazaqstan men Túrkııa yntymaqtastyǵyn zertteýshiler úshin qundy eńbek bolaryna senemin» deıdi.
Túrkııa Respýblıkasynyń eks-prezıdenti Abdolla Gúl «Ǵalamat jetistiktiń jemisi» atty maqalasynda «Osydan on jyl buryn Túrkııa Respýblıkasynyń prezıdenti retinde qymbatty baýyrym Nursultan Nazarbaevpen birge halyqaralyq deńgeıdegi saltanatty jıynǵa qatysyp, tilektestigimdi bildirgen edim. Astananyń jańa megapolıs retinde qalyptasýy – joǵary mártebeli Nursultan Nazarbaevtyń ustanǵan strategııalyq saıasaty men kemel kóregendiliginiń nátıjesi dep nyq senimmen aıtýǵa bolady.
Túrkitildes memleketterdiń yntymaqtastyq keńesin qurý týraly Nahchyvan kelisiminiń eń belsendi qoldaýshysy Nursultan Nazarbaev bolǵandyqtan, men ony «Túrki áleminiń aqsaqaly» dep jarııalaǵan edim. Qazaqstan Prezıdenti bul qurmetke ábden laıyq tulǵa!» dep aǵynan jarylypty.
Túrkııa Respýblıkasy Prezıdentiniń Bas keńesshisi Iаlchyn Topchý «Azat eldiń altyn táji» maqalasynda «Bolashaqta qazirgi álem tarıhy jazylar ýaqytta Qazaqstan men qazaq túrkileri bóliminde «Tuńǵysh Prezıdent», «Túrki dúnıesiniń aqsaqaly Nursultan Nazarbaev», «Astana qalasy» degen sózder bir uǵymǵa aınalyp, qatar atalatyn bolady. Astana – «Asıtaneı Shahane», ıaǵnı «patshanyń tabaldyryǵy, tańǵajaıyp bas qala» degendi bildiredi. Bul anyqtama kezinde Ystanbul úshin qoldanylǵan edi. Memleketter men elderdiń qalyptasý tarıhynda uly kóshbasshylar qandaı rólge ıe bolsa, basty sheshimder shyǵarylǵan shaharlar da mańyzdy oryn alǵan. Qazirgi Qazaqstannyń negizin salǵan aqsaqalymyz – kóshbasshy Nursultan Nazarbaev táýelsiz eldiń sımvoly retinde Astanany irgetasynan bastap túbegeıli josparlap, árbir ǵımarattyń qurylysyn qaltqysyz qadaǵalap, ár kirpishin qamqor qolmen qalady», deıdi.
Túrkııa Respýblıkasynyń Syrtqy ister mınıstri Mevlıýt Chavýshoǵlý «Túrki áleminiń aqsaqaly, joǵary mártebeli Prezıdent Nursultan Nazarbaevtyń baıypty baılamynan keıin, 1998 jyly Qazaqstannyń bas qalasy retinde Astananyń bekitilýi táýelsiz qazaq eli tarıhyndaǵy aıshyqty oqıǵalardyń biri boldy. Qadirmendi Nursultan Nazarbaevtyń aıqyn uıǵarymy shamamen júz jyl buryn Túrkııa Respýblıkasynyń ákimshilik ornyn Ankaraǵa kóshirgen Uly kóshbasshymyz Gazı Mustafa Kemal Atatúriktiń boljaǵyshtyq qasıetin eske salady. Astana – el ordasy bolyp jarııalanǵan kúnnen baýyrlas shahar Ankara syndy jedel damyp, Qazaqstannyń sımvolyna aınaldy, Prezıdent Nursultan Nazarbaevtyń danalyǵymen modernızasııalanǵan eldiń álemdik arenadaǵy bet-beınesin tanytty», degen pikirin bildirgen.
Baǵashar TURSYNBAIULY,
«Egemen Qazaqstan»