Qazaq memlekettik qyzdar pedagogıkalyq ýnıversıtetinde túlekterge dıplom tapsyrý rásimi ótti. Bıyl oqý ornyn 1538 stýdent pen 168 magıstr bitirip otyr, dep habarlaıdy oqý ornynyń Baspasóz jáne qoǵammen baılanys bólimi.
Túlekterdiń 1020-sy kúndizgi, 518-y syrtqy bólim boıynsha támámdady. Olardyń 276-sy úzdik dıplom ıegeri. Pedagogıkalyq bilim men ǵylymnyń qyr-syryn jete meńgerip, kásibı maman ıesi atanyp, úlken ómirge joldama alǵandar qatarynda Jaratylystaný, Áleýmettik-gýmanıtarlyq, О́ner jáne mádenıet, Pedagogıka jáne psıhologııa, Fızıka-matematıka, Qazaq fılologııasy jáne álem tilderi fakýltetteriniń túlekteri bar.
Saltanatty rásim belgili aqyn Ǵafý Qaıyrbekovtyń jurtshylyq arasynda keńinen taraǵan, dara oqý ornynyń arýlaryna arnalǵan «Almatyda kóshesi bar Gogoldiń...» óleńimen ashyldy. Jıynnyń resmı bóliminde ýnıversıtet rektory Gaýhar Aldambergenova quttyqtaý sóz sóılep, bitirýshilerge aq jol tiledi.
– Qymbatty jas túlekter! Sizder búgin 75 jyldyq tarıhy bar, otandyq joǵary bilimniń qara shańyraǵy – Qyzdar Ýnıversıtetin bitirip, úlken ómirge joldama alǵaly otyrsyzdar! Bul – barlyǵymyz úshin de erekshe kún, mańyzdy mereke. Ýnıversıtet ujymy úshin de, Sizderden úmit kútken ata-analaryńyz úshin de óte úlken qýanysh. Memleket basshysy Nursultan Nazarbaev Qazaqstan halqyna arnaǵan Joldaýynda: «Qazaqstannyń álemdik órkenıetke jetýdegi birden-bir dara joly – bilim júıesi. Orta mektep – bilim júıesiniń eń basty býyny. Orta mektepte qalanǵan bilim negizi oqýshynyń bolashaǵyna jol ashady», dep atap ótken bolatyn.
«Qazirgi kezeńdegi basty máseleniń biri jańa tehnologııalardyń damýy kezeńinde bolashaq urpaqtyń tárbıesi men bilim alýynda ustazdardyń atqaratyn róli erekshe. Egemen elimizdiń bolashaǵy, onyń álemdik órkenıettegi óz orny, eń aldymen bilim men tárbıeniń bastaýy – ustaz qolynda» degen Elbasy árqashanda ulttyń bolashaǵy pedagogtyń qolynda ekendigine basa mán berip keledi. «Ustazdar ustahanasy» atanǵan Qyzdar Ýnıversıtetiniń túlekteriniń qatarynda esimderi elge tanymal qoǵam qaıratkerleri, Memlekettik syılyqtyń laýreattary, belgili ǵalymdar men ustazdar, dańqty sportshylar bar. Sizder de sol shalqar kóshti jalǵastyryp kelesizder, – dedi Gaýhar Tóremuratqyzy.
Oqý ornynyń basshysy túlekterdiń aldynda turǵan basty mindet – ýnıversıtetten alǵan bilimderin tájirbıemen ushtastyra otyryp, eńbek naryǵynda básekelestik qabileti joǵary kásibı tulǵa bolý ekendigin atap ótti.
– Ustaz – bolashaq urpaqtyń baǵbany, shákirtiniń boıyna bilimmen birge tárbıe sińirýshi, janyna jaryq sáýle seýip, kókiregin nurlandyrýshy. Sizderdiń basty maqsattaryńyz egemen elimizdiń bolashaq jastaryn tárbıeleýge, bilimi men biliktiligin arttyrýǵa, memleketimizdiń damýyna súbeli úlesterińizdi qosý! О́mir jolyndaǵy saparlaryńyz sátti bolǵaı, bolashaqqa bastaǵan qadamdaryńyzǵa aq jol tileımiz, – dedi Gaýhar Aldambergenova.
Sonymen qatar, ýnıversıtet rektory bir top bitirýshige dıplomdy saltanatty jaǵdaıda tabystady. Olardyń qatarynda oqýda ozat, qoǵamdyq jumysta belsendilik kórsetken 12 stýdent pen magıstr bar. Ánmen áspettelip, kúımen kómkerilgen saltanatty kesh aıasynda kópshilik aldynda barlyq fakýltet bitirýshi túlekteri atynan Aıdana Tynyshqalı sahnaǵa shyǵyp, ýnıversıtet ujymyna rııasyz alǵysyn bildirdi.
– Barlyǵymyzdyń da alǵa qoıǵan úlken maqsatymyz bar. Sol úkilegen armandarymyzdy oryndaýǵa umtylýdamyz. Bizdi bilim áleminde óz kásibimizge saı maman bolyp qalyptasýǵa jol salǵan barsha azamattarǵa alǵys aıta otyryp, bilikti, bilimdi urpaq tárbıeleý jolyndaǵy ulaǵatty ustaz esimin abyroımen alyp ótýge, bolashaǵy baıandy, keleshegi kemel básekege qabiletti Máńgilik el – Qazaqstannyń qaryshty damýyna ant etemiz, – dedi A. Tynyshqalı.
Aıta keteıik, Qazaq memlekettik qyzdar pedagogıkalyq ýnıversıteti – elimizdegi birden-bir tek qyzdar oqıtyn joǵary oqý orny. Orta Azııa aımaǵynda mundaı oqý orny joq. Álemde de saýsaqpen sanarlyqtaı. Ýnıversıtettiń 6 fakýltetindegi 28 kafedra bakalavrıat boıynsha – 43, magıstratýra boıynsha – 23 jáne PhD doktorantýra boıynsha – 4 mamandyq negizinde muǵalimder daıyndaıdy. Sondaı-aq, syrttaı oqý bóliminiń stýdentteri 20 mamandyq boıynsha qashyqtyqtan oqytý tehnologııasyn paıdalanyp, bilim alady. Búginde oqý ornynda jalpy sany 7 myńǵa jýyq stýdent, magıstranttar men doktoranttar oqıdy. Olarǵa 55 ǵylym doktory, 230-dan astam ǵylym kandıdaty men 90-ǵa jýyq PhD doktory men ǵylym magıstri dáris beredi. Qazirgi kúnde munda stýdentterdiń sapaly bilim alyp, ǵylymmen, ónermen, sportpen aınalysýy úshin, olardyń boıynda halqymyzdyń ulttyq qundylyqtaryn darytý oraıynda birqatar jumystar jasalyp, ýnıversıtet otandyq joǵary oqý oryndary arasynda úlken bedelge ıe bolyp otyr.