Astana qalasynyń 20 jyldyǵy qurmetine Qostanaı qalasynyń irgesindegi Qostanaı aýdanynda ornalasqan «Arǵymaq» ıppodromynda at sportynan chempıonat ótti.
Oǵan Qazaqstannyń Almaty, Qaraǵandy, Atyraý, Aqmola, Qyzylorda, oblystarynan at bapkerleri men jankúıerler, shabandozdar, barlyǵy elýden asa sportshy keldi. Chempıonatta qostanaılyqtar men qonaqtar at sportynyń taı jarys, qunan báıge, top báıge, kókpar, teńge ilý, qyz qýý, jamby atý, aýdaryspaq, alaman báıge túrlerin tamashalady.
Ásirese, kórermen úshin alaman báıgeniń orny bólek. Oǵan elimizdiń ár shalǵaıynan on alty at qosyldy. Aýyzdyǵyn shaınap turǵan tulparlardyń quıryq tistesip, bir birinen ozýy da ońaı bolmady. Aqyrynda top attan úsh sáıgúlik sýyrylyp alǵa ozdy. Olar Qostanaıdan, Almatydan jáne Astanadan kelgen tulparlar bolatyn. Degenmen, máreni Jankeldın aýdanynan, ıaǵnı Torǵaıdan kelgen «Alý» atty sáıgúlik aldymen kesip ótti. Onyń shabandozy men bapkerine oblys ákimi Arhımed Muhambetov Volkswagen Polo mashınasynyń kiltin tabys etti. Bul Alýdyń alaman báıgeden ekinshi jeńisi.
«Biz «Alý» ekeýmiz jeńetinimizge senimmen kelgenbiz», deıdi qýanyshty jas shabandoz Baıeke Amanbaı.
Sońǵy jyldary Qostanaı óńirinde at sportyna degen qyzyǵýshylyq artyp keledi. Báıge bolǵan saıyn «Arǵymaq» ıppodromynda ıne shanshar oryn tabý qıyn. Astana kúni merekesinde «Arǵymaq» ıppodromyndaǵy qyzyqty kórgende armanda, kórmegende armanda boldy.
Názıra Járimbet
«Egemen Qazqstan»
Qostanaı
Sýretter alau.kz saıtynan alyndy