Shildeniń kúni jaýynmen bastaldy. Sol kúni jaryqtyq ysyp bastaldy da tús aýa taýdan aqsha bult kórinip, ǵaıyptan aýa raıy ózgerip shyǵa keldi. Ashyq aspandy aldymen aqsha bult japty. Shildeniń alǵashqy kúni kún kúrkiredi. Aýa raıy da ózgerip sala berdi.
Kıikoty bıiktigi 70 santımetrge jetetin kópjyldyq shóptektes ósimdik. Tik ári túkti, uzynsha tórt qyrly, sabaqtary qyzǵylt, kóp butaqty bolyp keledi. Japyraqtary qarama-qarsy ornalasqan. Saǵaqtary uzyn jumyrtqa tárizdi sopaqsha keledi, jıekteri bútin bir sýret dersiz. Joǵarǵy jaǵynan qaraǵanda japyraqtary jasyl tústi, eki jaǵynan da kishkene qara núkteleri bar áspetti keıpi elesteıdi. Gúlderi maıda, sypyrǵysh tárizdenip jıylǵan, qyzǵylt kúlgin tústi.
Mamyr aıynan bastap, tamyz aıy aralyǵyǵynda gúldeıdi. Onyń jer betindegi bóligin gúldegen kezinde jınap alady. Dúrııa dalany burqyratyp, ádemi jupar ısimen jan dúnıeńdi qytyqtap, sezimińdi terbep, ózgeshe ásermen baýrap alady. «Kıikoty sırep, tómennen úrkip, taýǵa shyǵyp ketipti». Talantty jazýshy aǵamyz Marhabat Baıǵutov «Qorǵansyz júrek» kitabyndaǵy «Kıikoty» áńgimesinde aıbarlaıdy. Kóńilindegi ádemi sezimdi bederlep jetkizedi. «Tómennen ıaǵnı adamdardan úrkip, taý basyna eriksiz shyǵyp ketken ań da, qus ta bar. Mysaly, bizdiń respýblıkanyń sımvoly bolyp jarııalanǵan Teńbil Barys. Arqarlar men taýteke, taýeshkiler. Kıigimiz sol. Qustan: ular, kekilik...
«Endi jan-janýarlardy qoıyp, ósimdik te taýǵa qaraı qashatyn bolypty. Kıikotynyń shıpaly qasıetin bilip alǵan kelimsekter ony baýdaı túsirip, otap jatyr eken» -dep jazady kemel jazýshymyz Sherhan aǵamyz jýyqta «Egemen Qazaqstan» qurastyrǵan bir tomdyq «Namys naızaǵaıy» jınaǵynda. Shirkin, Qarataýdyń eteginde búlkildep aqqan Balyqshy bulaǵynyń basynda ańqyldaı jetken jalbyzdyń burqyrap muryn jarǵan ańsar ıisi keledi eken. Janymyzdaǵy jolserik Serik Narymbetov degen azamattan suraǵanbyz:
- Bul jerde Kıikoty óse me?
- Myna Kóktóbeniń betkeıinde kóp, degen.
Taý basynda júrgenimizdi sonda bildik. Sál kóterilgenimiz sol, ıisi burqyraı Kıikoty aldymyzdan shyqty. Kóktóbeden bulaq basyna túserde bir tal Kıikotyn estelikke alyp, kúndelik dápterimizdiń bir betine salyp qoıdyq. Jaryqtyq, ıisi burqyrap, taý basynan bizben birge keledi. Kıikotynyń gúli.
Saparbaı PARMANQUL,
«Egemen Qazaqstan»
Túrkistan oblysy
Sýyndyq asýy
Sozaq aýdany