Bishkektegi G.Aıtıev atyndaǵy Qyrǵyz ulttyq sýret óneri mýzeıinde qazaqtyń maıtalman sýretshisi, gobelen-túkti toqyma óneriniń has sheberi Quttybek Jaqyptyń «Uly Dala áýeni» atty kórmesi ashyldy.
Kórme zańǵar jazýshy Shyńǵys Aıtmatovtyń 90 jyldyq mereıtoıyna jáne qyrkúıektiń birinshi aptasynda Ystyqkólde ótetin III Dúnıejúzilik kóshpendiler oıyndarynyń qarsańynda uıymdastyryldy.
Kórmeni qyrǵyz jurtshylyǵy, óner súıer qaýymy jyly qabyl aldy. Sýretshiniń qoldan toqylǵan gobelenderiniń kórkemdigine súısingen kórermen kóp boldy. Olardy Quttybek Jaqyp týyndylarynyń ózindik órnegi, pálsapasy qyzyqtyrdy.
Quttybektiń qutty qolynan shyqqan sýretterdegi oıý-órnekter men aıshyqtardan baýyrlas qazaq pen qyrǵyzdyń qolóneriniń bastaýy bir ekeni aıqyn ańǵaryldy. Múmkin, qyrǵyz kórermenderin baýrap alǵan sýrettegi osyndaı qubylys bolar.
Kórmege sýretshiniń «Uly Dala», «Baldáýren», «Qansonar», «Aq túıe», «Tuıǵyn», «Urshyq», «Aǵash ómiri», «Teatr» jáne basqa elýden asa túkti toqyma polotnosy qoıylǵan.
Nazarbek BAIJIGITOV,
Bishkek