QR Prezıdenti N.Nazarbaev Kaspııdiń ekojúıesin qorǵaý úshin besjaqty qujatty bekitýdi usyndy
Memleket basshysy Kaspııdiń ekojúıesin saqtaýǵa ujymdyq kúsh-jiger bolmasa, óńirdiń gúldenýi múmkin emes ekenin atap ótti.
«Kaspıı ekojúıesin saqtaý boıynsha jumysta negizgi ekpin bekire tuqymdastarynyń gendik qoryn qorǵaýǵa qoıylýy tıis. Álemdik popýlıasııanyń basym bóligi Kaspıı teńizinde meken etedi. Bul balyqtyń álemdik deńgeıdegi 90 paıyzy - bizde. Sońǵy 10 jylda balyq sany on esege azaıǵan. Bul turǵyda osy máseleni nazarǵa alý kerek», dep toqtaldy N. Nazarbaev.
Sondaı-aq, Elbasy bıoresýrstardy zańsyz aýlaýǵa qatysty jaqyn arada besjaqty qujatty bekitýdi usyndy.
«2010 jyldan bastap bekire tuqymdas balyqtardyń popýlıasııasyn saqtaý maqsatynda balyqty kommersııalyq aýlaýǵa moratorıı kúshine endi. Bizdiń kózqarasymyz boıynsha, taraptar iske asyrǵan sharalardyń tıimdiligi jetkiliksiz bolyp tur. Tek Qazaqstannyń shekara qyzmetiniń sharalary aıasynda balyqty zańsyz aýlaǵandardy quryqtaý deńgeıi artyp keledi. Sonymen birge, tárkilengen aýlar men balyq aýlaýdyń ózge de quraldarynyń sany kóbeıip jatyr. Osyǵan baılanysty teńizdiń biregeı ekologııalyq júıesin saqtaý maqsatynda jaqyn arada besjaqty qujatty bekitý usynylady. Ol qujat bıoresýrstardy zańsyz aýlaýmen kúreske qatysty. Bul baǵyttaǵy jumystar 2010 jyly bastalǵanyna qaramastan, biz ony áli de laıyqty deńgeıge jetkize almadyq», dedi Elbasy.