Taıaýda Kókshetaý qalasyndaǵy Maǵjan Jumabaev atyndaǵy oblystyq ámbebap-ǵylymı kitaphanasynda Keńes Odaǵynyń Batyry Málik Ǵabdýllınniń ǵylymı-ádebı eńbekteri qamtylǵan 11 tomdyq kitaptyń tusaýkeseri ótkizildi.
Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasyn júzege asyrý sharalary aıasynda ótkizilgen tusaýkeserge batyrdyń qyzy Maıdan Málikqyzy bastaǵan aǵaıyn-týystary, qoǵam qaıratkerleri, jergilikti aqyn-jazýshylar qatysty. Oblys ákimi Málik Myrzalın Aqtóbe, Ońtústik Qazaqstan, Soltústik Qazaqstan, Pavlodar oblystary men Astana, Stepnogor qalalary jáne oblysymyzdyń 17 aýdanynan kelgen kitaphana ókilderine oqyrman oljasyna aınalatyn jınaqtardy saltanatty túrde tabys etti.
Bul jınaq Almaty qalasyndaǵy halyqaralyq qazaq PEN-klýbynyń prezıdenti Bıgeldi Ǵabdýllınniń basshylyǵymen «Idan» baspasynan 1000 dana tırajben jaryq kórip otyr. Saltanatty jıynda sóz sóılegen Bıgeldi Ǵabdýllın Málik Ǵabdýllınniń eńbekterin shet tiline aýdarý qajettiligine toqtalyp, taıaýda jazýshy Sáken Júnisovtiń «Amanaı men Zamanaı» povesi aǵylshyn tiline aýdarylyp, jaryqqa shyǵatynyn aıtyp, jınalǵan qaýymdy bir qýantyp tastady. Málik Ǵabdýllın mýzeıiniń dırektory Qudaıberli Myrzabek ǵalym Máliktiń mazmuny tereń eńbekteri qamtylǵan jınaqty daıyndaý barysyndaǵy jumysqa toqtaldy.
Saltanatty jıynda sóz sóılegen jazýshy Jabal Erǵalıev Uly dalanyń birtýar uldaryn ulyqtaý «Máńgilik el» jalpyulttyq ıdeıasymen astasyp jatqanyn tilge tıek etti. Ǵalymdar kitap mazmunyna qysqasha sholý jasasa, batyrdyń qyzy Maıdan Málikqyzy ákesiniń mol muralaryn máńgilik este qaldyrýǵa zor múmkindik týǵyzǵan el aǵalaryna óz rızashylyǵyn bildirdi.
Baıqal BAIÁDIL,
«Egemen Qazaqstan»