Tilsiz jaýdyń biri – sý. Jaz aılarynda salqyndaımyn dep sýǵa túsip, onyń qaýpin elemeýdiń saldary talaılardy ókinishke qaldyryp júrgeni belgili.
Osyndaı oqys oqıǵanyń biri jýyrda Shıeli aýdanynda da qaıtalana jazdady. Báıgequm kóline Qyzylorda qalasynan kelgen bir top demalýshylardyń arasyndaǵy K. esimdi 22 jasar jigit kól ortasynda qaıyqtan sekirip túsip, jaǵaǵa deıin júzip barmaqshy bolady. Jas adam kól sýynyń aqpaıtyn, aýyr bolatyndyǵyn eskermegen sekildi.
Bastapqyda maltyǵanymen sálden soń-aq qulashy jazylmaı sýǵa bata bastaıdy. Ony jaǵaǵa shyǵarǵansha, jigittiń aıaq-qolynyń tamyrlary tartylyp, júrek soǵysy da báseńsigen. Abyroı bolǵanda osy mańda serýendep júrgen erli-zaıypty dárigerler Qoshqarbaevtar oqıǵa ornynan tabylyp, alǵashqy jedel kómekti óte saýatty atqaryp shyǵady. Qyzylorda oblystyq ortalyq aýrýhanasynda hırýrg qyzmetin atqaratyn Nurbol men oblystyq balalar aýrýhanasynyń ýzısti Aıjan osylaısha adam densaýlyǵyna tóngen qaýiptiń bultyn seıiltti. Ile-shala tótenshe jaǵdaı organy qutqarýshylarynyń kómegimen Shıeli aýdandyq aýrýhanasyna jetkizildi.
Shıeli aýdany aýrýhanasynyń terapııa bóliminiń meńgerýshisi Baqyt Ismagýlovanyń aıtýynsha, jigit aýrýhanaǵa tús mezgilinde, óte aýyr jaǵdaıda kelip túsken. Jalǵas Abdýhojaev pen Erlan Sartbaev esimdi dárigerler aýyr jaǵdaıda jatqan jigitti reanımasııa bólimine qabyldap alyp, shuǵyl áreket jasaǵan. Jigittiń tynys alý joldaryna zaqym kelip, ózdiginen dem ala almaǵandyqtan IVL apparaty qosylǵan. Ertesine ǵana arnaıy apparat alynyp, jigit ózi demalatyn jaǵdaıǵa jetti. Esin de jınady. Reanımasııa bóliminde 4 kún boıy jatyp, besinshi kúni terapııa bólimine aýystyryldy.
Jigittiń jaǵdaıy jaqsarýy úshin Shıeli aýdany aýrýhanasynyń qyzmetkerleri barynsha ter tókti. Naýqas óte kóp mólsherde sý jutyp qoıǵandyqtan em-shara qabyldaý barysynda Aqtilek Danııarova fızıkalyq kabınette arnaıy jattyǵýlar jasatyp, tynys alý joldaryn retke keltirdi. Em-sharanyń barlyǵy nátıjeli aıaqtalyp, 15 shilde kúni ol aýrýhanadan shyǵaryldy.
Balanyń ata-anasy qutqarǵan adamdarǵa jáne Shıeli aýdandyq aýrýhanasynyń dárigerlerine úlken rızashylyǵyn bildirip otyr. Qashanda «adam-adamǵa dos, baýyr» degen qaǵıdanyń saltanat qurýy bir-birimizge degen meıirimimizdi oıata túsedi. «Saqtansań – saqtaımyn» demekshi, jamandyq aıtyp kelmeıdi. Sol sebepti barynsha abaı bolyp, qandaı jaǵdaı bolmasyn saqtyq sharalaryna qamdanyp júrgenimiz abzal.
Nurmahan NAZYMHANULY
Qyzylorda oblysy, Shıeli aýdany