Fýtzaldan Almatyda ótip jatqan stýdentter arasyndaǵy álem birinshiliginiń tusaýkeser kezdesýinde Chehııany 4:3 esebimen utqan Qazaqstannyń erler quramasy búgin saǵat 20:00-de Jańa Zelandııamen kúsh synasady.
«Almaty Arena» sport kesheninde óten álem birinshiliginiń ashylý saltanatynda alǵashqy bolyp sóz alǵan qala ákimi Baýyrjan Baıbek Qazaqstan Respýblıkasynyń Prezıdenti –Ult kóshbasshysy Nursultan Nazarbaevtyń syndarly saıasatynyń arqasynda elimizde ekonomıka, áleýmet, mádenıet, sport jáne basqa da salalardy damytýda kóptegen ıgi sharalardyń júzege asyp jatqandyǵyn basa aıtty. Rasynda da, byltyr Astanadaǵy halyqaralyq EKSPO kórmesiniń jáne Almatydaǵy qysqy Dúnıejúzilik Ýnıversıadanyń uıymdastyrylýynyń arqasynda atalmysh qalalarda birqatar kórki kóz súısindiretin, zaman talabyna saı ǵımarattar paıda boldy. Sport salasyna qatysty aıtatyn bolsaq, qazirgi kezde Alataý bókterinde boı kótergen «Astana Arena» men «Halyq Arena» keshenderinde júzdegen sharalar ótip, kóptegen úıirmeler jumys isteýde. Sonyń arqasynda myńdaǵan jastardyń esh alańsyz daıarlanýyna jaǵdaı jasalyp otyr.
Jarystyń ashylý saltanatynda Qazaqstan Respýblıkasy Bilim jáne ǵylym mınıstri Erlan Saǵadıev jáne Halyqaralyq stýdentter sporty federasııasynyń (FISU) vıse-prezıdenti Marıan Dymalskıı de sóz sóılep, qatysýshylarǵa sáttilik tiledi.
Osy shara barysynda jınalǵan qaýym qyrshyn ketken dańqy sportshy Denıs Tendi eske aldy. Olımpııa oıyndary men álem chempıonattary jáne basqa da asa iri halyqaralyq jarystarda jeńis tuǵyryna kóterilgen áıgili mánerlep syrǵanaýshy jaıynda beınerolık kórsetildi. Sodan keıin ortaǵa kók týymyzdy órenderimiz alyp shyqty. «Almaty Arenada» Qazaqstannyń ánurany shyrqalyp, jarysqa qatysýshylar ant berdi.
Esterińizge sala keteıik, Almatyda ótip jatqan álem birinshiligi 26 tamyzǵa deıin sozylady. Bul jarysta 17 memleketten kelgen 500-den asa sportshylar baq synaýda. Atap aıtsaq, erler arasynda 16 jáne áıelder saıysynda 9 komanda sheberlik baıqasýda.
Qazaqstannyń áıelder quramasy da búgin Jańa Zelandııamen kezdesedi. Bul báseke 18:00-de bastalady. Elimizdiń qos komandasy da toptyq týrnırdegi óz oıyndarynyń barlyǵyn «Almaty Arenada» ótkizedi. Erteń bizdiń jigitter Bolgarııamen, al qyzdar Portýgalııamen kúsh synasady.
Ǵalym SÚLEIMEN,
«Egemen Qazaqstan»
ALMATY