Forbes jýrnaly 2018 jyly eń kóp tabys tapqan áıel sportshylardyń tizimin jarııa etti. Osy tizimdegi eń úzdik 10 arýdyń segizi tennısshiler eken. Sondaı-aq, «TOP-10» sportshynyń qatarynda bir badmıntonshy men bir avtosportshy bar.
Bıylǵy jylǵy baı-aýqattylar tiziminde Serena Ýılıams aǵaryp alda tur. Uzaq jyldar boıy álemdik reıtıngte kósh bastap, «Úlken dýlyǵa» sanatyndaǵy týrnırlerde 38 márte (jekelegen jáne juptyq saıysty qosa alǵanda – red.) top jaryp, WTA týrnırlerinde 72 ret dara shyqqan 36 jastaǵy AQSh-tyń áıgili tennısshisi bıylǵy jyldyń ózinde 18,1 mıllıon dollar tabys taýyp otyr.
Odan keıingi bes oryndy da osy sport túriniń ókilderi ıemdenýde. Olar – danııalyq Karolın Voznıaskı (13 mıllıon), amerıkalyq Sloan Stıvens (11,2 mıllıon), ıspanııalyq Garbıne Mýgýrýsa (11 mıllıon), reseılik Marııa Sharapova (10,5 mıllıon) jáne AQSh-tyń taǵy bir ókili Vınýs Ýılıams (10,2 mıllıon).
Jetinshi orynda – Pýsarla Venkata Sındhý. Badmınton sportyn serik etken 23 jastaǵy Úndistannyń sulýy ústimizdegi jyly 8,5 mıllıon dollardy óz esepshotyna aýdarǵan. Seziginshi orynda – Sımona Halep. Búgingi tańda tennısshilerdiń álemdik reıtınginde kósh bastap turǵan Rýmynııanyń maqtanyshy 7,7 mıllıondy ámııanyna saldy. Toǵyzynshy satyǵa Danıka Patrık jaıǵasty. Avtosport saıystarynda aldyna jan salmaı júrgen amerıkalyq arýdyń tabysy – 7,5 mıllıon. Úzdik ondyqty qorytyndylap turǵan – Anjelıka Kerber. Germanııanyń tennısshisi bıyl 7 mıllıon dollardy qaltaǵa basty.
Ǵalym SÚLEIMEN,
«Egemen Qazaqstan»