QR Úkimetiniń baspasóz ortalyǵynda ótken brıfıngte bilim jáne ǵylym vıse-mınıstri Ashat Aımaǵambetov apatty jáne úsh aýysymda oqytatyn mektepter máselesi qalaı sheshilip jatqanyn aıtyp berdi.
Vıse-mınıstr atap ótkendeı, atalǵan másele bir sátte sheshile almaıtyn máselelerdiń biri. Elimizdegi keıbir mektepterde oryn bolmaýynyń sebepteri demografııalyq jáne mıgrasııalyq jaǵdaılar bolyp otyr. Jyl saıyn elimizdiń megapolısterine halyqtyq kóptep aǵylýy baıqalýda. Mysaly, 2017 j. Astanaǵa tek 17 myńnan astam bala kelgen. Iаǵnı, bul Astanada ótken jyl úshin keminde qosymsha 15 mektep salý kerek degendi bildiredi.
«Biz mektepter salyp jatyrmyz. Tek bıyldyń ózinde respýblıkalyq bıýdjet esebinen 110 mektep salynyp jatyr. Jyl sońyna deıin 72 jańa mektepti paıdalanýǵa beremiz dep kózdep otyrmyz», — dedi A. Aımaǵambetov.
Jyl saıyn elimizde respýblıkalyq bıýdjet esebinen 100-200 mekteptiń salynatynyna qaramastan, másele tolyqqandy sheshilmeı otyr. Qazaqstanda áli kúnge deıin 127 úsh aýysymdyq, 44 apatty mektep bar. Osyǵan baılanysty jan basyna qarjylandyrý engiziletin bolady.
«Jan basyna shaqqanda qarjylandyrý jeke sektordy jańa mektepter salyp, ashýǵa yntalandyratyn bolady. Búginde pılot bastalyp jatyr. Biz jekemenshik mektepterdiń ashylyp jatqanyn kórip otyrmyz», — dedi vıse-mınıstr.
Onyń negizine Qazaqstanda mektepke deıingi mekemelerdi salýdyń oń tájirıbesine alyndy.
«Birneshe jyl buryn mektepke deıingi bilimmen qamtý elimizde nebári 60% edi, qazir – 93%. Buǵan jeke sektordy tartý esebinen qol jetkizildi. Memleket basshysy "Balapan" baǵdarlamasyna bastama bildirdi. MJÁ-men jumys jandandy. Osy 7 aı ishinde engizilgen 40 myń orynnyń 30 myńy jeke kompanııalardiki», — dedi vıse-mınıstr.
Sonymen qatar A. Aımaǵambetov jekemenshik mektepterde memleket memlekettik tapsyrysty ornalastyratynyn aıtty. Vıse-mınıstrdiń aıtýynsha, ata-analar aıyrmasyn baıqamaıdy. Sebebi tegin orta bilim alý qamtamasyz etiletin bolady.
A. Aımaǵambetov búgingi tańda elimiz boıynsha muǵalimder sanynyń jetkilikti ekenin aıtyp ótti. Pedagogtardy daıarlaý sapasyna erekshe kóńil bólinip otyr. Qazir elimizdegi ustazdar sany – 285 myń adam. Jyl saıyn ýnıversıtetterde 35 myń adam pedagog mamandyǵyn alyp shyǵady. 2018 j. memlekettik grantpen oqytylǵan 6 myń bolashaq muǵalimder bitirdi.