...Ol kezde «Parasat» jýrnalynyń redaksııasy Kók bazardyń janyndaǵy toǵyz qabatty ǵımarattyń jetinshi qabatynda edi. Naryq qyspaǵy bet qaratpaı turǵan qıyn shaq bolatyn. Kók bazarda kim kóp, ury-qary kóp. Kún saıyn sýmańdap bizdiń ǵımaratqa da kirip-shyǵyp júredi. Ana bólimnen qulaqshyn, myna bólimnen kýrtka, sharf joǵalypty dep baıa-shaıa bolyp jatamyz.
– Apyr-aı, aıaq astynan qaıdan sap ete qalady eken, á? –deımin men bizdiń bólimdegi Zákeńe qarap.
– Kimdi aıtasyń? – dep ol kisi qaǵazdan basyn kóterip, maǵan qaraıdy.
– Kimdi bolýshy edi, álgi... ury-qarylardy aıtamyn da.
– Á-á, – deıdi Zákeń endi qolyndaǵy qalamyn ústeldiń betine qoıyp. – Al sen sol ury-qarylardy qandaı adam dep oılaısyń, aıtshy?
– Qandaı bolýshy edi? – deımin men ol kisiniń bul suraǵyna az-kem tańyrqap. – Kók bazar mine, irgemizde turǵan joq pa?! So jaqtan keletin qaı-qaıdaǵy bireýler...
– Jo-oq, – dedi Zákeń daýsyn sozyp, meniń pikirimmen kelispeı, úzildi-kesildi basyn shaıqap. – Qaı-qaıdaǵy bireýler emes olar! Qazirgi urylar shyrttaı bop kıinip, galstýk taǵyp, qolyna portfel ustap júredi. Eger olarmen dálizde qarama-qarsy kezdesip qalsaq, sen ekeýmiz bylaı yǵysyp, qalaı jol bergenimizdi bilmeı de qalamyz.
Maǵan Zákeńniń myna logıkasy óte qyzyq bolyp kórinedi. Sondyqtan da basymdy shaıqap, onymen keliserimdi de, kelispesimdi de bilmeı ań-tań bolamyn.
Sodan...
Bir kúni hatshy qyzdyń: «Bastyq shaqyryp jatyr!» degen daýsy degbirimdi alyp, apaı-topaı shyǵa jóneldim de, bas redaktor tez ákel, nómirge salamyz dep asyqtyrǵan maqalany alaıyn dep jyldam qaıtyp oralsam, álgi bizdiń bólimge Zákeń aıtqandaı qolynda portfeli bar, shyrttaı bop kıingen bir ıntellıgent sýmańdap kirip barady. Sońynan:
– Toqtańyz! – dep aıǵaıladym jan daýsym shyǵyp. – Qaıda barasyz?!
Álgi kisi selk ete tústi. Tipti artyna burylyp qaraýǵa da murshasy bolmaı, qolyndaǵy portfelin jerge túsirip aldy. Sonsoń jelkesinen bireý myltyq kezep turǵandaı daýsy dirildep:
– Á-á... me... men... Zá-Zákeńe kelip em, – dep ázer ún qatty. – Ma... maǵan ol ótkende bir mýzyka jóninde materıal kerek dep edi... – Ýh! –dedim ózime ózimniń kúlkim kelip. – Aıyp etpeńiz... Ol kisi saǵat on birde keledi jumysqa.
Nurǵalı ORAZ,
«Egemen Qazaqstan»