Almatydaǵy Jambyl atyndaǵy Qazaq memlekettik fılarmonııasynda Ulttyq ǵylym akademııasynyń akademıgi, jazýshy, Qazaqstannyń eńbek sińirgen qaıratkeri, fılologııa ǵylymdarynyń doktory, Halyqaralyq Sh.Aıtmatov akademııasynyń akademıgi, Sh.Ýálıhanov syılyǵynyń laýreaty, memleket jáne qoǵam qaıratkeri Ýálıhan Qalıjanovtyń «Tilegim de, tiregim de, júregim de bir ózińsiń – Týǵan el» atty ǵylymı-shyǵarmashylyq keshi bolyp ótti.
1978 jyly «Aqmolla aqynnyń ómiri men tvorchestvosy» taqyrybynda kandıdattyq dıssertasııasyn, 1999 jyly «Qazaq ádebıetindegi dinı-aǵartýshylyq aǵym» (HIH ǵasyrdyń ekinshi jartysy men HH ǵasyrdyń basy) doktorlyq dıssertasııasyn qorǵaǵan Ý.Qalıjanovtyń ómir joly ádebıet pen ulttyq jýrnalıstıkanyń tizginin teń ustap, qatar qyzmet etýimen egiz órkendep otyrdy. Respýblıkalyq «Ulan», «Jas alash», «Egemen Qazaqstan» gazetteriniń bas redaktory, 1995 jyly Qazaqstan Respýblıkasynyń Baspasóz jáne buqaralyq aqparat quraldary mınıstriniń orynbasary, Prezıdent Ákimshiliginiń Ishki saıasat bólimi meńgerýshisiniń orynbasary qyzmetterin atqarǵan ol qaı istiń janynan da qaıratkerligimen tanyldy. Táýelsizdik alǵan jyldardan keıin eldiń sózin sóıleıtin, múddesin úndeıtin Parlament Májilisiniń 1999-2011 jyldar aralyǵyndaǵy II,III, IÚ shaqyrylymdarynyń depýtaty boldy.
Zııaly qaýymnyń qalyń shoǵyry jınalǵan shyǵarmashylyq kesh Ýálıhan Qalıjanovtyń áńgimesine qurylǵan fılmnen bastalyp, onda taǵylymdy ómir jolynyń belesteri mazmundy hronıkalarmen baıandalyp ótti. Derekti fılmde kesh ıesi kindik qany tamǵan týǵan jerine, asyr salyp ósken aýylyna saǵynyshyn, perzenttik júreginiń lúpil-iltıpatyn arnady.
Elbasy N.Nazarbaevtyń mereıtoı ıesine joldaǵan quttyqtaý hatyn Almaty qalasy ákiminiń orynbasary Sultanbek Mákejanov oqyp berdi.
Akademık О́mirzaq Aıtbaev pen aqyn, Qazaqstan Jazýshylar odaǵynyń tóraǵasy Ulyqbek Esdáýlet Ýálıhan Qalıjanovtyń azamattyq kelbeti men qaıratkerlik qyryn ashatyn estelikterimen bólisip, týǵan eldiń rýhanı ıgiligi jolynda tynymsyz eńbektenip kele jatqan janashyrlyǵyn, jaýapkershiligin joǵary baǵalady. Respýblıkalyq «Egemen Qazaqstan» AQ Basqarma tóraǵasy Darhan Qydyráli «Ý.Qalıjan – jýrnalıst» atty taqyrypta baıandama jasap, jýrnalıstıkanyń alǵy shebinde kele jatqan qarymdy qalamgerdiń qazaq baspasóziniń tarıhynda óz ornyn talassyz aıǵaqtaıtyn eńbegine, balalar basylymyn, jastar gazetin, ulttyń únjarııasyn bir-birimen sabaqtastyra damytqan kúsh-jigeri men bas redaktor retindegi qarymyna, parasat-paıymyna toqtalyp, úlken ómir asýyndaǵy kezeńderdi egjeı-tegjeıli saralap shyqty. Abaı atyndaǵy Qazaq Ulttyq pedagogıkalyq ýnıversıtetiniń rektory, professor Tahır Balyqbaevtyń «Ý.Qalıjan – ǵalym-jazýshy» degen baıandamasy búginde M.Áýezov atyndaǵy Ádebıet jáne óner ınstıtýtyn basqaryp otyrǵan ádebıetshi ǵalymnyń ǵylymdaǵy aıshyqty izderin aıqyndap kórsetýge baǵyttaldy.
Kesh sońynda Qazaqstannyń Halyq artısi Maqpal Júnisova, Erjan Belǵozıev syndy belgili ártister men «Qońyr» etnotoby, Nurken Áshir, Syrym Jaǵypar sekildi jas talanttar óner kórsetti. Mereıtoı ıesiniń ózi de «Kózimniń qarasyn» shyrqap, qonaqtarǵa shýaqty kóńil kúı syılady.
Aıgúl AHANBAIQYZY,
«Egemen Qazaqstan»
ALMATY