Astanada qalamger, ádebıet synshysy Amangeldi Keńshilikulynyń 50 jyldyq mereıtoıyna arnalǵan keshi ótti.
«Qazaqty súıý» dep atalǵan shyǵarmashylyq keshke qalamgerler Myrzataı Joldasbekov, Tólen Ábdik, Qajyǵalı Muhametqalı qatysty. Aǵa býyn ókilderi quttyqtaý sózinde Amangeldi Keńshilikulynyń jas ta bolsa, qazaq ádebıeti synyna aralasyp, jańasha baǵyt ákelgenin tilge tıek etti.
Qalamgerdi mereıtoıymen quttyqtaǵan «Nur Otan» partııasy Tóraǵasynyń Birinshi orynbasary Máýlen Áshimbaev A. Keńshilikulyn arnaıy Alǵys hatpen marapattady.
«Ákem «ákesi dostyń balasy da dos» dep jıi aıtýshy edi. Búgin belgili qalamger Amangeldi Keńshilikulynyń 50 jyldyq mereıtoıyna arnalǵan shyǵarmashylyq keshte osy bir sóz qaıta-qaıta sanamda jańǵyryp turdy. Sebebi, ákem Saǵat Áshimbaev Ábekeńniń ákesi, qazaqtyń aıtýly aqyny Keńshilik Myrzabekovpen úzeńgi qaǵystyrǵan joldas, dos bolatyn», dedi Máýlen Áshimbaev.
Sondaı-aq, M. Áshimbaev quttyqtaý sózinde «Amangeldi Keńshilikuly áke izin laıyqty jalǵap, qazaq ádebıetinde ózindik orny men qoltańbasyn qalyptastyrǵan qalamger. Onyń syn janryndaǵy eńbekteri men esseleri óziniń tereń mazmunymen oqyrmandardy qalyń oıǵa jeteleıtini sózsiz»» dep atap ótti.
Qazaqstan PEN klýbynyń prezıdenti Bıgeldi Ǵabdýllın Maǵjan Jumabaev atyndaǵy altyn medaldi tapsyryp, temir tulpar mingizdi.
«Egemen Qazaqstan» AQ basqarma tóraǵasy Darhan Qydyráli mereıtoı ıesin quttyqtap, aq jarma tilegin arnady. «El gazeti Egemenniń «Jan saraı» aıdaryna shyqqan suhbatyńyz arqyly búgingi mereıli kúnińizdi 200 myń oqyrmanǵa súıinshilep jetkizdik. Amangeldi Keńshilikulynyń bolmysyndaǵy ádilettilik, shynshyldyq qasıetteri ony kóp qalamgerden daralap kórsetedi. Joǵary ıntellektýaldyq qasıetińizben ədebıetimizge qyzmet ete berińiz», dedi Darhan Qydyrəli.
Atyraý oblysy ákimi Nurlan Noǵaevtyń quttyqtaý hatyn aqyn Alııa Dáýletbaeva jetkizip, temir tulpar mingizdi. Týǵan jeri Qostanaı oblysynan kelgen qonaqtar da izgi lebizin bildirdi.
Aıta keteıik, Amangeldi Keńshilikulynyń «Aq jaýyn», «Qarlyǵash-dáýren», «Sóz patshasy», «Qazaqty súıý», aqıyq aqyn Muqaǵalı Maqataevtyń shyǵarmashylyǵyna arnalǵan «Máńgilik sáýlesi», «Júrek sózi», «Parasat bıigi», «Rýh jyry» jáne «Turaqsyz álemniń sýretkeri» sııaqty zertteýleri, esseleri, synı maqalalary toptastyrylǵan kóptegen kitaptary oqyrman kóńilinen erekshe oryn alǵan.
Aqmaral AǴZAMQYZY,
«Egemen Qazaqstan»