Almaty oblysynyń tilderdi damytý jónindegi basqarmasynyń uıymdastyrýymen «Til – rýhanı jańǵyrý tetigi» atty respýblıkalyq pikirsaıys týrnıri ótti.
Bilim men til ustartý ónerine qushtar ul-qyzdyń basyn qosqan debatta memlekettik tildiń qoldanys aıasyn keńeıtý maqsatynda túrli taqyryp aıasynda tapsyrmalar berildi. Eki kúnge sozylǵan týrnırde qatysýshylar BPF jáne APF formatynda, ıaǵnı aǵylshyn parlamenti men Amerıka parlamenti úlgisinde pikir saıystyryp, aqtyq kezeń úshin jarysty. Nátıjesinde 20 komandanyń ishinen sýyrylyp shyqqan úzdik toptar kópshilik aldynda tolǵamdy tujyrymdaryn dáleldep, erekshe kózge tústi.
Qyzyqty ótken «Til – rýhanı jańǵyrý tetigi» týrnıriniń bas júldesi men arnaıy Kýbok Astana kelgen «Aspannan úlken» komandasyna buıyrsa, birinshi oryn tarazdyq topqa berildi. Al munan keıingi júldeli oryndarǵa shymkenttik «Álemge tanymal myrzalar» toby men almatylyq «Intısar» komandasy laıyqty boldy. Júldegerlerdiń barlyǵyna qomaqty qarajat tabystaldy.
- Halqymyzdyń «Bilekti birdi, bilimdi myńdy jyǵady» degen ulaǵatty sózi bilimniń baǵa jetpes úlken rýhanı qarý ekendigin, sonymen qatar asa zor óndirgish kúsh ekenin kórsetedi. Al, qazaq sheshendik sózderi — bastay alar qaınar bulaqtaryn túrkilik tanymnan túpten tartyp, ózindik ulttyq erekshelikterdi, qasıetterdi boıyna jınaqtap, kórkemdik qyatymen, ǵıbrattyq sarynymen daralanǵan, sondaı-aq, asa baı poetıkalyq tilimen ózgeshe qalypta kóringen, halqymyzdyń ryhanı azyǵyna aınalǵan kórkemdik qubylys. Sondyqtan da baba murasy – urpaqqa ulaǵat, keıingige amanat, keler kúnmen birge jasaıtyn rýhanı asyl qazyna. Búgingi kúnniń pikirsaıysy – keshegi ótken halyq danalyǵynyń, asyl qasıetteriniń qazirgi zamanǵa saı jańalanǵan beınesi, - deıdi jarys jaıynda Almaty oblysynyń tilderdi damytý jónindegi basqarmasynyń basshysy Aıdar Bashbaev.
Qalmahanbet MUQAMETQALI,
«Egemen Qazaqstan»
Almaty oblysy