Astanadaǵy QazGZÝ gýmanıtarlyq zań kolledjinde «Stýdentterdiń áleýmettik belsendiligin qalyptastyrý jáne tárbıeleýde kolledjdegi medıasııasynyń mańyzy» taqyrybynda jıyn ótti. Basqosýda QazGZÝ gýmanıtarlyq zań kolledji men «Halyqaralyq medıasııa, menedjment jáne quqyq mektebi» JShS ózara memorandýmǵa qol qoıdy.
Halyqaralyq medıasııa, menedjment jáne quqyq mektebi men kolledjder arasynda tuńǵysh qol qoıylǵan kelisimshart negizinde ekijaqty tájirıbe almasý baǵytynda kóptegen jumystar istelmek. Eń aldymen atalǵan kolledj bazasynda Stýdentter medıasııasynyń mektebi ashylady.
Jıynǵa qatysqan medıatorlar jastarǵa, ásirese zań salasy boıynsha bilim alyp jatqan stýdentterge medıasııany meńgerýdiń mańyzdylyǵy zor ekenin aıtty. «Medıasııa úlken sala. Medıasııa arqyly eki jaq kelisip, sotqa deıin máseleni sheship kete alady. Kezinde qazaq dalasynda eshqandaı prokýror, mılısııa, túrme bolmaǵan. Onsyz-aq ǵasyrlar boıy berekeli ómir súrip kelgenbiz. Tek bitimgershilik, kelisim bolǵan. Qazaq sózge toqtaǵan halyq. Daý bolsa bıler men qazylar sheship otyrǵan. Medıasııa – daý-damaıdy ýshyqtyrmaı, sotqa deıin kelisimge alyp kelý. Bul birinshiden, sottardyń isin jeńildetedi. Ekinshiden, qoǵamdaǵy saıası morlaldik ahýal rettelip, adamdar arasyndaǵy keshirimshildik pen aýyzbirshilik sııaqty qundy qasıetterimiz jandanady esepteımin. Kelisimshartqa qol qoıý arqyly jas mamandarymyzǵa medıasııa júıesiniń negizin uǵyndyrý jáne ony durys paıdalanýdy úıretsek degen nıettemiz. Búgingi basqosý stýdentter men medıatorlar arasynda ǵana ótse, aldaǵy ýaqytta Advokattar palatasy, Jeke sot oryndaýshylar palatasy, Notarıat palatasymen de kezdesýler bolady. Sondaı-aq biz medıasııany fakýltatıvti pán retinde kirgizýdi de josparlap otyrmyz. Memorandým negizinde ol sabaqtardy medıasııanyń mamandary júrgizetin bolady jáne stýdentter tájirıbeden ótý úshin medıasııa mektebiniń is-sharalaryna qatysady», dedi QazGZÝ gýmanıtarlyq zań kolledjiniń prezıdenti Jomart Qoshqarov.
Halyqaralyq medıasııa, menedjment jáne quqyq mektebiniń dırektory Ásel Saılaýbaıdyń aıtýynsha, jastar men jasóspirimderdi bul salaǵa beıimdeý kóptegen máseleniń ońtaıly sheshilýine múmkindik beredi. «Germanııada mektepter men kolledjderde medıasııa qosymsha sabaq retinde oqytylady da, dıplomynda kórsetiledi. Bul olardyń jumysqa turýyna qolaıly. О́ıtkeni medıasııany biletin adam qarym-qatynasqa sheber, basqarý jumysyn jaqsy atqara alatyn bolady. Al Bolgarııada arnaıy medıatorlar mektebi bar. Sonyń negizinde men Qazaqstanda mektep quryp jatyrmyn. Medıasııa kóptegen salany qamtıdy. Bul salany meńgerý úshin jan-jaqty bolý kerek. Iаǵnı, Qylmystyq kodeksti, Azamattyq kodeksti bilý, psıhologııany meńgerý shart. Medıator bolý úshin zań mamany bolý mindetti emes. Ár adamnyń boıynda medıatorlyq qasıet bar. Mysaly, ata-analar balalarynyń arasyndaǵy máselelerdi sheship jatady. Erli-zaıyptylardyń ajyrasýlardyń sebebin anyqtaıtyn bolsaq, ol túkke turǵysyz nárseden bastalady eken. Biraq sonyń barlyǵy jınalyp kelip aradaǵy daý-damaı ýshyǵady da, neden bastalǵanyn tipti ózderi umytyp qalyp jatady. Sondyqtan biz kóptegen otbasylardy saqtap qalý úshin de jumys isteımiz. Qazir bizdiń qoǵamda psıhologqa barýdy kóp adam jón sanamaıdy. Sondyqtan olar medıatordyń kómegine júginedi. Sóıtip ózara bitimge kelip, máseleni oń sheshedi. Ásirese medıasııany balalarǵa, jastarǵa sińdire bilgen durys», deıdi medıator Á.Saılaýbaı.
Jıynda bundaı basqosý elordadaǵy basqa kolledjerdede jalǵasyn tabatyndyǵy aıtyldy. «Qazirgi kezde kóptegen damyǵan memleketterde madıasııa óte joǵary deńgeıde damýda. О́ıtkeni eki jaqty bir-birimen tatýlastyrý úlken máselelerdi sheshýge jol ashady. Bul sala bizdiń elimizde de damý ústinde. Jastarǵa medıasııany túsindirý jáne ony qoldaný boıynsha jumystar atqarylyp jatyr. Ol tek zań salasynda bilim alyp jatqan stýdentterdi ǵana emes, árbir jasqa kerek dúnıe. Sondyqtan Astana qalasynyń barlyq kolledjderinde myqty medıatorlar men zańgerler túsindirý jáne tájirıbe jumystaryn jalǵastyrady», dedi «Jas Otan» jastar qanaty Astana qalasy fılıalynyń birinshi orynbasary Baǵdáýlet Jandildaev.
Aıta keteıik, is-shara Joǵarǵy sot, Qazaqstan halqy Assambleıasy, «Nur Otan» partııasy jáne Astana qalasy ákimdigi sııaqty birneshe uıymnyń uıytqy bolýymen ótti.
Maıgúl SULTAN,
«Egemen Qazaqstan»