О́skemende Rýhanı kelisim kúni aıasynda birqatar is-sharalar ótkizildi. Ataýly kúnge oraı Dene shynyqtyrý-saýyqtyrý kesheninde dinı birlestikter arasynda sporttyq oıyndar uıymdastyrylyp, jeńimpaz komandalarǵa kýboktar men syılyqtar tabystaldy. Oblystyq din isteri basqarmasynyń muryndyq bolýymen Dostyq úıi-qoǵamdyq kelisim ortalyǵynda oblystyq dinı birlestikter basshylarymen «Rýhanı kelisim – Táýelsiz Qazaqstannyń basty jetistigi» taqyrybynda dóńgelek ústel ótkizildi.
Saltanatty jıynnyń bastalýy aldynda dóńgelek ústelge qatysýshylar oblystyq tarıhı-ólketaný mýzeıi, A.Pýshkın atyndaǵy oblystyq kitaphana, «Muhamadı» meshitiniń kitaptar men fotosýret kórmesimen tanysty. Kórmede ártúrli konfessııalardyń dinderiniń damýyn kýálandyratyn dinı jádigerler, sırek kezdesetin qasıetti kitaptar, jazbalar, biregeı qujattar, fotosýretter usynyldy.
«Rýhanı kelisim kúni - Qazaqstandaǵy áleýmettik mańyzy bar kúnderdiń biri. Konfessııalar men etnostar arasynda kelisimdi saqtaý - memlekettik organdar, dinı birlestikter men qoǵamdyq uıymdardyń birlesip istegen úlken jumysynyń jemisi», - dedi Din isteri basqarmasy basshysynyń mindetin atqarýshy T.Jigitaev.
Dóńgelek ústel barysynda dinı birlestikter basshylary shyǵysqazaqstandyqtardy Rýhanı kelisim kúnimen quttyqtap, qoǵamdaǵy beıbitshilik pen kelisimdi, turaqtylyqty saqtaýda tıimdi jumystar jasaýǵa tilek bildirdi.
Is-sharaǵa «Din máseleleri jónindegi ǵylymı-zertteý jáne taldaý ortalyǵy» RMK-niń, Qazaqstan musylmandary dinı basqarmasynyń ókilderi men Qaskelei epıskopy, Astana Eparhııasynyń vıkarııi, jergilikti atqarýshy organdardyń, jergilikti dinı birlestikterdiń, etno-mádenı ortalyqtardyń, qoǵamdyq uıymdardyń basshylary qatysty.
Is-sharanyń sońynda birqatar dinı birlestikterdiń basshylary ultaralyq jáne konfessııaaralyq kelisimdi nyǵaıtýǵa qosqan úlesteri úshin Shyǵys Qazaqstan oblysynyń gramotasymen marapattaldy.
Azamat QASYM,
«Egemen Qazaqstan»
О́SKEMEN