Atyraý degende ádette munaı men balyq aldymen eske túsedi. Qazynaly ólkede ónerdiń de bási bıik. Bıyl mádenıet salasyna jergilikti bıýdjetten 4,5 mlrd teńge bólindi.
Mádenıet uıymdaryna avtokólikter alyndy, shyǵarmashylyq ujymdardyń sahnalyq kıimderi men mýzykalyq aspaptary jańartyldy. Atap óter jańalyqtyń biri – Saraıshyq qalashyǵyn Jaıyq ózeniniń arnasy shaıyp ketýinen saqtap qalý maqsatynda jaǵany bekitý jumystary júrgizildi. Atyraý qalasy men Mahambet aýdanynda eki mádenıet úıi salyndy. Qazir óńirde 8 mádenıet nysanynyń qurylysy júrip jatyr.
Oblystyq mádenıet, arhıvter jáne qujattama basqarmasynyń basshysy Salamat Sabyrdyń aıtýynsha, Memleket basshysynyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda aımaqta 193 is-shara iske asqan. «Qasıetti Qazaqstan» kartasyna Atyraýdan 7 nysan endi. Bıyl Mahambet aýdanynda Mahambet О́temisulyna arnalǵan eskertkish turǵyzyldy. Endi oblys ortalyǵynda Ábý Sársenbaev, Qarshyǵa Ahmedııarov, Hamıt Erǵalıevtiń eńseli eskertkishteri boı kóteredi.
Oblystyq tarıhı-ólketaný mýzeıiniń qazirgi ǵımaraty tolyqqandy jumys júrgizýge tar bolyp tur, sondyqtan jańa ǵımarattyń tıisti qujattary daıyndalyp jatyr. Memlekettik arhıv te aldaǵy jyldary jańa orynǵa kóshedi. Endigi másele − Dına Nurpeıisova atyndaǵy Qazaq halyq aspaptar orkestrine ǵımarat kerek, qazir osy jaıt jergilikti atqarýshy bıliktiń nazarynda. Sondaı-aq 800 oryndyq konsert zalynyń qujattary daıyndaldy. О́ner, ádebıet salalarynyń ókilderine arnalǵan shyǵarmashylyq ortalyq ta aldaǵy jyldary boı kóteredi.
О́ńirdegi shyǵarmashylyq ujymdar Úndistan, Makedonııa, Portýgalııa, Túrkııa, Reseı, Vengrııa, Serbııa, Fransııa memleketterine gastroldik saparǵa bardy. Talantty jastardyń talaptaryna qoldaý kórsetilip keledi, sonyń nátıjesinde respýblıkalyq, halyqaralyq baıqaýlarǵa qatysqan 14 ónerpaz bas júldeni, 30-ǵa jýyǵy júldeli oryndardy jeńip aldy.
Baqytgúl BABASh,
«Egemen Qazaqstan»
ATYRAÝ