Kezdesý barysynda Nursultan Nazarbaev Qazaqstan men Reseıdiń EAEO aıasyndaǵy tıimdi yntymaqtastyǵyn atap ótti.
— Bizdiń qarym-qatynasymyz damyp keledi. Týyndaǵan máseleler elderimizdiń Úkimetteri deńgeıinde sheshilip jatyr. Sizben birge Baıqońyr qalasyn odan ári damytý máselesin talqyladyq. Biz qazir 8 jylǵa arnalǵan tıisti «jol kartasyn» ázirledik, — dedi Qazaqstan Prezıdenti. Sondaı-aq, Memleket basshysy respýblıkamyzdyń EAEO-ǵa tabysty tóraǵalyq etkenin jáne bul kezeńde odaqtyń Keden kodeksi kelisilip, qol qoıýǵa daıyn bolǵanyn aıtty.
— Otyrysqa qatysatyn memleketter basshylary osy qujatty qoldaıdy dep oılaımyn. Eýrazııalyq ekonomıkalyq odaq elderi arasynda taýar aınalymy báseńdedi, ol bırja baǵamynyń bizdiń taýarlarǵa degen qatynasyna baılanysty. Bul rette saýdanyń naqty kólemi saqtalýda, — dedi Nursultan Nazarbaev.
Qazaqstan Prezıdenti Reseı Federasııasymen áskerı-tehnıkalyq yntymaqtastyqty odan ári damytýǵa nıetti ekenimizdi atap ótti. Budan bólek, Nursultan Nazarbaev V.Pýtınge Sırııa qaqtyǵysy jóninde Astanada kelissózder ótkizý úshin Qazaqstan múmkindik berýge daıyn ekenin aıtty.
— Qazaqstan — ıntegrasııalyq úderisterge belsene atsalysyp kele jatqan el. Tabysty memlekettiń ıntegrasııalyq jobalardy belsendi túrde júrgizýi Eýrazııalyq ekonomıkalyq odaqtyń barlyq elderine paıdasyn tıgizip otyr, — dedi V. Pýtın.
Ekijaqty kelissózder qorytyndysy boıynsha tómendegideı qujattarǵa qol qoıyldy:
— «Baıqońyr» kesheninde yntymaqtastyqty odan ári jalǵastyrý tujyrymdamasy;
— Baıqońyr qalasynyń mártebesi jáne ondaǵy atqarýshy ókimet organdaryn qurý tártibi men olardyń mártebesi týraly memleketaralyq kelisimge ózgerister engizý týraly 1995 jylǵy 23 jeltoqsandaǵy hattamanyń Qazaqstan Respýblıkasynyń memlekettik organdarynyń tizimine qatysty bóligi.